Истражувањето што го објави реномираното медицинско списание Лансет, утврдило дека само 0,65 проценти од луѓето по втор пат биле позитивни на тест за КОВИД-19, откако претходно биле заразени во текот на првиот и вториот бран на пандемијата во Данска. Тоа е многу пониско од 3,27 проценти колку што имало позитивни на вирусот по употребата на многу попрецизните ПЦР тестови, откако претходно биле негативни на брзиот тест.
Но, студијата утврдила дека лицата постари од 65 години имаат само 47 процентна заштита од повторување на инфекцијата, во споредба со 80 процентната заштита кај помладите лица.
“Нашата студија потврди она кое бројни други го сугерираа: повторна инфекција со КОВИД-19 е поретка кај младите, здрави лица, но кај повозрасните е поголем ризикот дека повторно ќе се заразат“, вели Стин Етелберг од Институтот Staten Serum во Данска.
“Бидејќи е поверојатно дека старите лица ќе имаат и посериозни симптоми на болеста и за жал ќе починат, нашите наоди јасно даваат до знаење колку е важно да се применуваат политиките на заштита на постарите во текот на пандемијата“, се додава во претставувањето на истражувањето.
Авторите на студијата не пронашле дека заштитата од повторна зараза паѓа во текот на шест месеци од болеста, но истакнуваат дека е потребно да се превземат понатамошни истражувања за да се утврди заштитата против повторна зараза кај различни варијанти на вирусот.
Податоци кои биле предмет на анализата собрани со помош на данската национална стратегија за тестирање, во состав на која се 69 проценти од популацијата или четири милиони лица, биле тестирани во текот на 2020.
Коментирајќи ги резултатите, професорите од Империал колеџот во Лондон, Розмари Бојтон и Дани Алтман, велат дека резултатите покажуваат послаба заштита и дека “повеќе загрижуваат“ отколку некои претходни истражувања.
“Овие податоци потврдуваат, ако тоа воопшто е потребно, дека можеби нема да може да ги исполниме очекувањата за стекнување на заштитен имунитет против SARS-CoV-2 по пат на природни инфекции и дека трајна солуција е глобална програма за многу ефикасни вакцини“, наведуваат авторите во написот поврзан со ова истражување, исто така објавено во Лансет.
