Неколку студии покажале дека вирусот SARS-CoV-2 може да предизвика забрзано стареење. Истражувачите сугерираат дека мозокот на некои пациенти може да остари 10 години, а неодамнешна студија објавена во списание за клиничка медицина покажала дека трајниот ментален ефект на тешкиот КОВИД-19 може да биде еднаков на 20-годишно стареење.
ГОЛЕМО ВЛИЈАНИЕ НА КОГНИТИВНИТЕ СПОСОБНОСТИ
Студијата ја спровеле истражувачи од Универзитетот Кембриџ и Империал Колеџ Лондон, а биле опфатени 46 испитаници кои се лекувани од КОВИД-19.
Истражувачите откриле дека пациентите страдале од когнитивни оштетувања и губитоци, слични на оние што вообичаено се гледаат кај лица на возраст од 50 до 70 години, односно – ефектот бил како да изгубиле 10 IQ поени.
Исто така, истражувачкиот тим утврдил дека тие ефекти биле присутни подолго од шест месеци по тешко заболување од КОВИД-19, а опоравувањето било многу постапно.
“Десетици илјади луѓе во Англија поминаа низ единиците за интензивна нега поради КОВИД-19, а многумина исто така се разболеа без да бидат примени во болница. Ова значи дека голем број луѓе се соочуваат со когнитивни проблеми со месеци по болеста“, вели авторот на студијата, професор Адам Хемпшир, додавајќи дека постои итна потреба да се најдат начини да им се помогне на овие луѓе.
НИЗА СИМПТОМИ СЕ ЈАВУВААТ СО МЕСЕЦИ ПО ПРЕЛЕЖУВАЊЕТО
Се повеќе се присутни докази дека КОВИД-19 има силен ефект на мозокот, што предизвикува долготрајни когнитивни и ментални проблеми.
Симптомите како мозочна магла, замор, нарушувања во спиењето, анксиозност, пациентите ги пријавуваат и со месеци по опоравувањето, односно по негативниот тест на коронавирус.
Според една неодамнешна студија, пациентите кои закрепнале од тешка форма на ковид страдале од когнитивна загуба.
“Когнитивното оштетување е вообичаено за широк спектар на невролошки нарушувања, вклучувајќи деменција, па дури и рутинско стареење. Но, обрасците што ги видовме кај КОВИД-19 се разликуваат“, додава авторот на друга студија, професор Дејвид Менон.
Тестовите на мозокот биле спроведени кај пациенти вклучени во студијата во просек шест месеци по прележувањето. Така биле мерени нивните ментални способности, вклучувајќи помнење, внимание и расудување. Резултатите потоа биле споредени со здрави поединци.
НЕКОИ ПАЦИЕНТИ МОЖЕБИ НИКОГАШ НЕМА ЦЕЛОСНО ДА СЕ ОПОРАВАТ
Податоците покажале дека лицата кои прележале КОВИД-19 биле помалку прецизни, како и дека имале побавно време на одговор од лицата кои биле здрави и не се разболеле. Ефектот бил уште поизразен кај пациенти кои биле на респиратор.
Проф. Менон вели дека некои пациенти биле следени 10 месеци по прележување на болеста и кај нив било воочено благо подобрување.
“Иако тоа не е статистички значајно, барем е чекор во вистинска насока. Но, постои можност некои од нив никогаш во целост да не се опорават“, додава тој.
Истражувачите исто така нагласуваат дека благо оштетување е воочено и кај пациенти со поблага форма на КОВИД-19.
