Ефикасноста на третата доза вакцина Фајзер или Модерна против коронавирусот значајно се намалува до четвртиот месец по примањето на оваа дополнителна доза, се наведува во најновата студија што пред три дена ја објави американскиот Центар за контрола и превенција на болести (ЦДЦ).
Досега со научни докази е поткрепено дека ефективноста на вакцините се намалува по двете дози, но релативно малку е објавено за траењето на заштитата по примањето на трета, дополнителна бустер доза.
Новата студија се заснова на податоци од 241.204 посети во итните служби и 93.408 хоспитализации на возрасни лица заболени и со симптоми на КОВИД-19 во периодот од 26 август 2021 до 22 јануари 2022 година.
Ефикасноста на вакцините била проценета врз основа на споредба на веројатноста за позитивен тест на коронавирус помеѓу вакцинирани и невакцинирани пациенти и користењето статистички методи за контрола за календарската недела, географската област, со прилагодување според возраста, локалното ниво на пренос и карактеристиките на пациентот како што се коморбидитетите.
За време на периодот во кој доминирал омикрон, ефикасноста на вакцините, во случај на испитаници кои отишле во итните служби поради симптоми кои наликувале на КОВИД-19 била 87 проценти во првите два месеци по третата доза, но опаднала на 66 проценти до четвртата месец.
Ефективноста на вакцините против хоспитализација била 91 отсто во првите два месеци, но паднала на 78 отсто до четвртиот месец по третата доза.
“Сознанието дека заштитата што ја нудат вакцините базирани на информациска РНК се намалува во месеците по примање на третата доза вакцина, ја зајакнува важноста за понатамошно разгледување на дополнителни дози за одржување или подобрување на заштитата“, заклучиле авторите.
Според Ентони Фаучи, главен медицински советник во Белата куќа, веројатно е дека ќе биде потребна четврта доза за групи на лица кои имаат послаб имунолошки одговор, како што се повозрасни лица и имунокомпромитирани.
