Носењето маски во јавност со цел да се забави ширењето на КОВИД-19 широко го препорачуваат здравствените работници ширум светот. Тоа покрена студии кои ја истражуваат физиката на употребата на маски и пренесувањето на болеста, како и низа истражувања за материјалите и останатите проблеми што влијаат на начинот на кој делуваат маските.
Стручното списание Physics of Fluids објави напис “„Перспектива на однесувањето на протокот на течните респираторни капки и аеросоли преку заштитните маски во контекст на SARS-CoV-2“ што го потпишуваат Санџеј Кумар и Хау Пу Ли. Тие ја проучувале употребата на маски и дошле до заклучок за начинот на кој маските го филтрираат или блокираат вирусот. Еден од клучните аспекти на функцијата на маските ја вклучува големината на капките течост исфрлени од носот и устата кога лицето зборува , пее, кива, кашла или само диши. Најчесто станува збор за поголеми капки, со големина од 5-10 микрони. Тие условно се мали: како за споредба, човечката коса има дијаметар од околу 70 микрони.
Најголема опасност се крие во капките помали од пет микрони. Тие можат да се аеросолизираат и долго да останат да лебдат во воздухот. Меѓу многуте видови маски кои се користат – платнени, хируршки, N95… само оние со ознака N95 можат да филтрираат капки со големина на аеросоли.
Прегледани биле и епидемиолошки студии за да се открие дали маските го намалуваат репродукцискиот број: ако тој се спушти под 1, заразата престанува да се шири.
“Резултатите сугерираат дека доследната употреба на ефикасни маски, како хируршки, би можела да ја искорени пандемијата кога барем 70 проценти од населението би носело такви маски и доследно би ги користеле во јавност“, вели Кумар.
Дури и помалку ефикасните платнени маски би можеле да го забават ширењето на заразата, само ако доследно и правилно се носат, додава тој.
