Нова студија, објавена во понеделникот во списанието Nature сугерира дека е можно вакцините против КОВИД-19 кои ги направија компаниите Фајзер и Модерна, пружаат доживотна заштита од оваа болест.
Научниците откриле дека лицата кои примиле две дози од било која од овие две вакцини (во земјава се користи единствено Фајзер вакцината), развиле силен и постојан имунолошки одговор на коронавирусот. Притоа, се покажало дека неутрализирачки антитела што се произведуваат се ефикасни во борбата против двете варијанти на SARS-CoV-2.
Тоа значи дека лицата кои ги примиле овие вакцини, може да имаат долготраен имунитет, повеќегодишен, па дури и доживотен и дека нема да треба да се довакцинираат, дури ни во случај да коронавирусот дополнително мутира во нови варијанти.
“Издржливиот имунитет што го создаваат двете вакцини е добар знак“, вели д-р Али Елбеди, имунолог од Универзитетот Вашингтон, кој е водечки автор на споменатата студија.
Во истражувањето на ефикасноста на вакцините на Фајзер и Модерна против КОВИД-19, учествувале 41 лице, од кои, осум претходно биле заразени со коронавирус.
Научниците во рамките на истражувањето ги проучувале и лимфните јазли, жлезди кои произведуваат мемориски лимфоцити Б, клетки на имуниот систем кои ги помнат заканите со кои човекот се соочува.
Благодарение на тие клетки, имуниот ситем на човекот може побрзо да дистрибуира антитела за повторна борба со таа иста закана. Исто така, ако снема антитела, мемориските лимфоцити Б може уште да произведат. Мемориските лимфоцити Б во крвотокот на човекот може да циркулираат со години, па дури и со децении.
Откако лице ќе се вакцинира против КОВИД-19 или ја прележи болеста, во лимфните јазли се формира герминативен центар, место каде срелите лимфоцити Б се одгледуваат, диференцираат и ги менуваат гените на своите антитела во текот на нормална реакција на организмот на инфекцијата.
Научниците од лимфните јазли на учесниците на истражувања пет пати земале примероци – три, четири, пет, седум и 15 недели по примање на првата доза вакцина.
Истражувањето покажало дека герминативните центри на учесниците во студијата биле многу активни и четири месеци по примање на вакцината, како и дека бројот на мемориските лимфоцити Б, кои ја запомниле болеста КОВИД-19, не е опаднат.
Герминативните центри кај повеќето вакцини се најактивни во текот на двете недели по имунизацијата, а потоа продуктивноста им опаѓа.
“Факт е дека реагираа и четири месеци по вакцинирањето, што е навистина одличен знак“, вели Елбеди.
Иако во студијата учествувале лица кои примиле Фајзер вакцина, Елбеди вели дека истите сознанија може да се применат и на вакцината на Модерна, бидејќи овие две вакцини се направени со помош на иста технологија, технологија на информациска РНК (мРНК).
