Малку е веројатно дека лице ќе се зарази со новиот коронавирус SARS-CoV-2 ако дојде во контакт со површина на која претходно паднале честички од вирусот, се вели во заклучокот на најновата студија на проф. Емануел Голдман, микробиолог на Универзитетот Рутгерс во САД, објавена во научното списание The Lancet.
“Во болниците се тестирани површини во близина на пациенти кои биле заболени од КОВИД-19 и на нив не е пронајдена заразна варијанта на вирусот. Меѓутоа, на површините е пронајдена вирусна рибонуклеинска киселина (РНК) која е “трупот“ на вирусот. Тоа е единственото што останува кога вирусот умира, Кога ќе се најде во околината, вирусот е многу слаб и многу побрзо изумира“, објаснува проф. Голдман.
Научниците и стручњаците за јавно здравство, на почетокот од годинава велеа дека инфицирањето преку контаминирани површини е проблем, а некои студии објавени во април тврдеа дека коронавирусот на површините може да преживее и неколку дена.
“Се сметаше дека до пренесување на вирусот доаѓа кога заразено лице ќе кивне или ќе се искашла во близина на некоја површина и дека лице би се заразило така што ќе ја допре таквата површина и потоа тие честички со дланките ќе ги пренесе на своите очи, нос или уста“, објаснува проф. Линзи Мар, експерт за заразни болести кои се пренесуваат преку воздух, на Универзитетот Вирџинија.
На луѓето тогаш им се советуваше редовно да ги дезинфицираат сите фреквентни површини, да ги бришат намирниците што ќе ги купат во продавница, па дури и да носат ракавици. Проф. Мар сега тврди дека тоа било претерување и дека сите докази упатуваат дека вдишувањето на честички од вирусот е доминантен начин на заразување.
Научниците сега знаат дека експериментите од почетокот на годината се правеле во кристално чисти лаборатории со многу поголеми дози на вирусот од оние кои може да се сретнат во вистинскиот живот.
Специјалистот за инфекции на дишните патишта, д-р Кевин Фенели од Националниот институт за здравје на САД, вели дека нема научни податоци кои би го оправдале постојаното дезинфицирање на кваките на вратите, пакетите и купените намирници. Исто така, нема научно оправдување за повеќечасовното дезинфицирање на фреквентните површини на аеродромите, повеќенаменските згради и јавниот превоз.
“Не сум се сретнал со податоци кои ја поткрепуваат тезата дека со вирусот се заразуваме така што тој на нас скока од тротоар“, вели Фенели.
Проф. Мар вели дека чистењето на површините не е најдобриот начин за забавување на ширењето на вирусот.
“Со оглед на тоа дека располагаме со ограничени ресурси и време, би било подобро да се занимаваме со чистење на воздухот, а не на површините“, вели таа.
Д-р Фенели се согласува со професорката и додава дека е поверојатно лице да се зарази во затворен простор како ресторан бидејќи во него престојуваат голем број луѓе.
Според Делфин Фармер, хемичарка на Универзитетот Колорадо Стејт вели дека шприцањето на просторот со дезинфекциони средства потенцијално може да биде и опасно.
“Обилното користење избелувач и водороден пероксид може да доведе до создавање на отровни честички кои потоа се вдишуваат. Може да предизвикаат оксидативен стрес, а некои се и чист отров“, потенцира Фармер.
Сите овие стручњаци повторуваат дела луѓето од новиот коронавирус најдобро можат да се заштитат така што ќе носат маска и ќе избегнуваат големи гужви.
“Времето кое го минувате во затворен простор со лица кои не се членови на вашето семејство, сведете го на минимум. Кога ќе се најдете во таков простор, задолжително носете маска. Кога се наоѓате на јавни површини или во јавен превоз, не допирајте се и сешто. Наместо да ги дезинфицирате тие површини, подобро почесто мијте ги рацете“, велат стручњаците.
