Од американскиот Центар за контрола и превенција на болести велат дека со оваа габичка се заразени стотина луѓе во САД. Станува збор за габата кандида аурис која „ги напаѓа“ луѓето со ослабен имун систем. Кандида аурис може да доведе до различни видови инфекции, вклучително и инфекција на крвта, рани, ушите, а детектирани се и примероци земени од респираторните органи.
Се почнало во 2009 година, кога докторите во Токио во увото на 70-годишна жена нашле примерок од габата која може, во посериозни случаи, да доведе и до инфекција на крвта. Досега во Америка се забележани скоро 600 случаи на зарази со оваа габичка, а најмногу во Њујорк.
Цела деценија откако е откриена, пријавени се случаи на зараза во повеќе од 30 земји ширум светот, пренесува Си-ен-ен.
„Овој податок е загрижувачки затоа што станува збор за супергабичка“, вели доктор Нита Огден за ЦБС. „Отпорна е на антигабични лекови, како и на сите средства со кои ги уништуваме бактериите и габите во болниците.“
Бидејќи не е јасно како оваа габа „одеднаш“ се раширила, стручњаците се прашуваат дали појавата на кандида аурис има врска со честата употреба на антибиотиците и антигабичните лекови.
„Се проценува дека постојат меѓу пет и шест милиони различни видови габи. Само неколку стотици можат да доведат до болести кај луѓето“, вели доктор Том Чилер.
Габа која се однесува како бактерија
Доктор Чилер смета дека ширењето на кандида аурис повторно е во центарот на вниманието заради опасноста од отпорност на антибиотици – се повеќе супербактерии не реагираат на лекови. Но нешто друго е во прашање кога се работи за габата.
„Ова е габа која се однесува како бактерија“, вели доктор Чилер.
Други видови на кандида веќе „патуваат“ со нас – на кожата, во цревата, но не предизвикуваат никаква инфекција освен ако не дојде до дисбаланс. Тоа може да се случи, на пример, кога антибиотиците ќе го намалат количеството на добри бактерии во цревата, па кандидата може да се прошири. Она на што посебно предупредуваат стручњаците кај кандида аурис е дека таа се пренесува и во болниците затоа што може да опстане на опремата и така директно да се пренесе на друга личност.
Во студијата објавена во октомври минатата година, се споменуваат 70 случаи на зарази со оваа габа. Анализираните примероци откриле дека овој вид кандида е отпорен на антигабични лекови кои се користат најчесто, а проблемот е во тоа што и со времето, во текот на лекувањето, може да мутира и да стане отпорна на уште лекови.
„Кога ќе стане отпорна, останува отпорна“, вели доктор Чилер. „Видовме како станува отпорна на сите три класи антигабични лекови, станува супергабичка, вид габа за која засега нема лек кој би можел да ја убие.“
