Нобеловата награда за физиологија и медицина за 2018 година е доделена на американскиот имунолог Џејмс Пи Алисон и јапонскиот професор Тасуку Хонџо кои разработија нов метод за имунотерапија при рак. Откритието на научниците од САД и од Јапонија доведе до лекување на напреден смртоносен карцином на кожата.
Двајцата научници независно еден од друг покажаа како различни стратегии за инхибирање на кочниците на имуниот систем можат да бидат искористени во лекувањето на ракот.
Темата имунотерапија веќе неколку години претставува тренд во истражувањата поврзани со лекување на карциномите.
Кога клетките на имуниот систем во телото ќе регистрираат т.н. Т-клетки, штетни клетки на туморот, може директно да ги нападнат. Долго време проблем претставуваше токму немањето начин како имуниот систем да ги препознае тие клетки, што всушност го направија нобеловите лауреати Алисон и Хонџо. Тие развија метод како клетките на рак да станат видливи за имуниот систем.
Методот на „чекпоинт блокада” веќе се употребува во третирањето на рак, што претходно ја разви научникот Алисон. Клетките на ракот испраќаат сигнали кои го кочат имуниот систем. Последицата е што имуниот систем не се бори против клетките, туку останува пасивен. Чекпоинт-блокаторот ги блокира сигналите на клетките од канцер и го активира имуниот систем. Имунотерапијата докажано функционира кај меланомите, но и кај ракот на бубрези. Според научниците, овој метод наскоро ќе може да биде искористен и за третирање на други типови рак и ќе може да ја замени стандарната хемотерапијата. Имунотерапијата веќе важи за четврт стандард при лекувањето на карциноми, покрај хирургијата, зрачењето и хемотерапијата.
