Омикрон варијантата на коронавирусот не влијае негативно на здравјето на срцето и крвните садови кај младите возрасни лица кои се вакцинирани, покажале резултатите на помала американска студија.
Студијата дошла со заклучок дека претходните варијанти на коронавирусот штетно влијаеле на срцето и васкуларниот систем на пациентите, поради што научниците очекувале слични обрасци кога го спровеле ова помало истражување меѓу група на млади лица.
Тие ја споредиле состојбата на 23 млади лица кои во последните шест недели се заразиле со една од варијантите на омикрон со 13 вакцинирани млади возрасни лица кои никогаш немале КОВИД-19. Учесниците во истражувањето имале просечно помеѓу 20 и 25 години.
Кардиоваскуларните здравствени маркери вклучувале функција на крвните садови и реакција на надразби, калцификација на ѕидовите на артериите, варијабилност на отчукувањата на срцето и срцев одговор на промените во крвниот притисок, објавено е во списанието American Journal of Physiology – Heart and Circulatory Physiology.
“Спротивно на нашата хипотеза, немаше разлика во ниту еден од овие параметри помеѓу здравите вакцинирани млади возрасни лица кои се заразиле со КОВИД-19 за време на бранот на омикрон варијантата и оние кои никогаш не биле болни“, посочуваат авторите во заклучокот на истражувањето.
Сознанието дека “сите варијанти на коронавирусот не се штетни за здравјето на срцето и крвните садови кај младите, инаку здрави возрасни лица е многу ветувачко“, велат тие.
“Сепак, постојат неодамнешни индикации според кои кардиоваскуларното здравје кај поединци може да биде долгорочно нарушено. Затоа, ќе треба да спроведеме дополнителни истражувања за да го одредиме долгорочниот исход на нивното кардиоваскуларно здравје“.
