Новиот делта сој брзо се шири и меѓу вакцинираните, но тие не развиваат симптоматска болест, а смртноста е 20 пати помала
Компанијата Фајзер пред неколку дена најави дека во август ќе побара од Агенцијата за храна и лекови на САД (ФДА) одобрување и за трета доза вакцина против коронавирусот. Фајзер и нејзиниот партнер Бионтек од Германија истакнуваат дека се се побројни доказире дека имунитетот кај луѓето почнува да опаѓа половина година откако се ваккцинирани со две дози. Истовремено, студиите покажуваат дека три дози од нивната вакцина Комирнати пружаат оптимална заштита од инфекција.
“Како што може да се види од податоците што ги објави Министерство за здравство на Израел, ефективноста на вакцините во превенција и на инфекции и на симптоматски болести опадна шест месеци по вакцинацијата, иако ефективноста во превенцијата на сериозни болести останува висока“, се наведува во изјавата на Фајзер. Но, ФДА и Центарот за контрола и превенција на болести на САД во заедничкото соопштение истакнуваат дека на Американците кои се целосно вакцинирани не им е потребна довакцинација со трета доза.
ЗАГРИЖУВАЧКИ ПОДАТОК
Бидејќи делта варијантата се шири во земји кои имаат висок процент на вакцинираност, како што се Израел и Велика Британија, клучното прашање е колку, постоечките вакцини одобрени во ЕУ, штитат од оваа многу заразна варијанта на коронавирус. Особено загрижува податокот на израелското Министерство за здравство дека уделот на вакцинирани меѓу новозаболените е помеѓу 40 и 50 проценти. Понатаму, прелиминарна студија на израелски научници покажува дека вакцината Фајзер е ефикасна 64 проценти против делта варијантата, што е значително пониска отколку против претходните варијанти.
На пример, кај оригиналната варијанта од Вухан, како и алфа или британската варијанта, оваа вакцина беше ефективна дури 94 проценти. Но, Фајзер вакцината и понатаму останува 93 проценти ефикасна против развој на тешки форми на КОВИД-19 и хоспитализација. Дека постојните вакцини обезбедуваат висока заштита од хоспитализација, покажува и студија на 14.019 случаи заразени со делта варијанта, објавена во јуни од страна на Агенцијата за јавно здравје на Англија (PHE). Таа студија покажа дека по две дози Фајзер вакцината е 96 проценти ефикасна во спречување на хоспитализација, а АстраЗенека 92 проценти.
“Високата ефикасност на вакцините во Велика Британија, каде што е доминантна делта варијантата, а повеќе од половина од популацијата е целосно вакцинирана, се согледува во моменталната стапка на смртност кај пациенти со КОВИД-19, која е 0,085 проценти или 20 пати пониска откоку во пикот на пандемијата“, вели Меган Кал, епидемиолог од Агенцијата.
Претходната студија во Велика Британија во мај покажа дека две дози вакцина Фајзер се 88 проценти ефикасни во спречување на симптоматска инфекција со делта варијантата. Но, во јуни, шкотските истражувачи проценуваа дека оваа бројка е малку пониска, околу 79 проценти.
