Од моторот во вашиот автомобил до компонентите во вашиот компјутер, механичките системи секогаш се загреваат кога работат посилно. Сега, ново истражување открило дека истото може да се каже и за мозокот.
Некои делови од мозокот можат да достигнат температури до 40 ° C, покажува новото истражување, иако тоа варира во зависност од полот, возраста и други фактори. За споредба, просечната орална температура во човечкото тело е обично пониска од 37°C
“Мене ме изненади наодот од нашата студија дека здравиот човечки мозок може да достигне температури кои би биле дијагностицирани како треска на кое било друго место во телото“, вели биологот Џон О’Нил од лабораторијата за молекуларна биологија на Советот за медицински истражувања (MRC) во Велика Британија.
“Така високи температури мерени се на луѓе кои доживеале повреди на мозокот во минатото“, додава тој.
Тимот користел техника наречена спектроскопија на магнетна резонанца (MRS), која вклучува мерење на хемиски примероци преку магнетни полиња. Тие информации ги комбинирале со податоци за циркадијалниот ритам и време од денот.
Просечната температура на мозокот била 38,5°C, откриле истражувачите, два степени повисока отколку под јазикот. Биле забележани варијации врз основа на возраста, полот и менструалниот циклус на учесниците.
Женскиот мозок бил во просек околу 0,4°C потопол од машкиот, најверојатно поради менструалниот циклус, додека највисоката забележана температура на мозокот била 40,9°C. Дневните варијации во просек биле околу 1°C.
“Откривме дека температурата на мозокот паѓа навечер пред спиење и се зголемува во текот на денот“, вели О’Нил. “Веруваме дека оваа дневна варијација е поврзана со долгорочното здравје на мозокот. Се надеваме дека ќе го истражиме ова следно“.
Понатамошните тестови на 114 лица кои претрпеле трауматска повреда на мозокот покажале дека во овие случаи температурата на мозокот варира уште повеќе, од 32,6°C до 42,3°C.
Се чини дека постои врска помеѓу ритамот на температурата на мозокот и шансите да се преживее траумата, иако ќе бидат потребни повеќе истражувања, пишува Science Alert.
