Ако вашиот ритуал навечер опфаќа чаша вино за опуштање која ја пиете со грижа на совест- слободно опуштете се, бидејќи науката ги потврди позитивните ефекти на виното врз вашето тело и изглед, пишува „Fitness Magazine“.
Добро е за срцето
Неодамнешното истражување на магазинот „Nutrition and Aging“, во кое биле вклучени 3 000 етнички различни жени заклучило дека умерената консумација на вино може да го намали ризикот од срцеви заболувања, а тоа, веројатно, се должи на полифенолите во виното, кои имаат силно антиоксидантно дејство.
Помага во одржување на мускулната маса
Француските истражувачи откриле дека ресвератролот, полифенол кој природно се наоѓа во кожата на црното грозје, освен во намалување на лошиот холестерол и зачувување на ѕидовите на крвните садови, помага и во одржување на мускулната маса – и тоа кај астронаутите, кои своите мисии ги вршат во бестежинска состојба, па мускулите им страдаат поради недостаток на активност.
Го намалува стресот
Иако звучи како добар изговор, ова е докажано: сите видови на алкохол (во умерени количини, секако!) ја смируваат активноста на мозокот и предизвикуваат ефект на смирување и заспивање.
Може да ја спречи загубата на меморијата
Возрасните лица кои се со прекумерна тежина, а кои земале ресвератрол во форма на додаток во исхраната во период од 6 месеци, поминале подобро на тестовите за краткорочно памтење од оние кои земале плацебо таблети, покажала студијата на „Journal of Neuroscience“.
Помага во согорување на маснотиите
Хемиското соединение што може да се најде во мускат (вид на грозје од кое се прави слатко бело вино) може да го забави растот на масните клетки, а со тоа и помага на работата на црниот дроб кај дебелите луѓе, вели една неодамнешна студија на Универзитетот во Орегон.
Го отстранува кариесот
И покрај тоа што содржи големи количини на овошен шеќер и понекогаш ја бои целата уста, и виното и екстрактот од грозје, може да бидат добри за вашите заби, бидејќи помагаат во отстранување на бактериите кои предизвикуваат кариес, пишува „Journal of Agriculture and Food Chemistry“.
Ги намалува шансите за рак на дојка
Истражувањето за „Journal of Women’s Health“ покажало дека умереното консумирање на црвено вино помага во намалување на ризикот од рак на дојка, што е многу важно бидејќи претходно се веруваше дека која било форма на алкохол го зголемува ризикот од каков било тип на карцином.
