Старо правило е дека кога кашламе треба да ја покриеме устата, особено ако сме болни. Се разбира, за да не ги заразиме другите. Но новото истражување покажува дека е можно грипот да се шири со самото дишење, не треба ни да се кашла ни да се кива, пишува „Тајм“.
„Луѓето постојано шират вируси, дури и кога не кашлаат“, вели Доналд Милтон, автор на студијата и професор во Школата за јавно здравство на Универзитетот Мериленд. „Затоа е важно да разбереме дека можеме да бидеме инфективни во кој било момент“.
За време на сезоната на грип 2012/2013 година, Милтон и неговите колеги ги проучувале студентите кои имале грип, обидувајќи се да ги следат како и кога исфрлаат честички од вирусот. Студентите, неколку пати по половина час седеле во посебна машина која можела да ги измери капките кои ги исфрлале додека дишеле, зборувале, кашлале или кивале. Со кашлањето исфрлиле некои честички на вирусот на грип, но научниците откриле дека околу половина од собраните аеросолни честички во моментите кога немало кашлање, исто така, содржеле течна супстанција, што укажува на тоа дека и со вдишување на таков воздух може да се разболиме.
Мажите исфрлале повеќе вирус преку кашлањето, отколку жените, но жените почесто кашлале. Луѓето со поголем индекс на телесна маса истиснале повеќе честички, бидејќи се смета дека повисокиот индекс на телесна маса е поврзан со посилно воспаление и почесто отворање и затворање на малите дишни патишта. Милтон напоменува дека студијата не ја следела трансмисијата, па е невозможно со сигурност да се тврди дека издишаните капки можат некому да му пренесат грип. Всушност, значењето на пренесување на болести преку воздухот е контроверзна тема во медицинскиот свет. Милтон, сепак, сугерира дека „ако лицето покрај вас изгледа навистина болно, а не мора да кашла, сигурно ќе ве зарази“.
Ако се докаже во иднина дека овие ситни капки во воздухот може да пренесат грип, тоа сигурно ќе донесе промени и во начинот на изградба и вентилација на јавните простори. Дотогаш, студијата треба да биде потсетник дека кога сме болни, треба да се држиме подалеку од другите луѓе и да останеме дома додека не оздравиме. Но што доколку болна личност, сепак, дојде во вашата канцеларија или стан? Нема добра вест за оние кои се плашат од клици: Милтон вели дека претходните истражувања покажаа дека маските малку помагаат во запирање на фините честички кои се мерени во студијата. Хируршките маски ги блокираат големите капки, но фините, ситни, аеросолни честички во никој случај.
