Најновите резултати од истражување спроведено на Универзитетскиот колеџ во Лондон, покажале дека ниту една мутација на новиот коронавирус SARS-CoV-2 не му ја зголемува способноста да се шири меѓу луѓето.
Научниците проучувале 31 сој на коронавирусот, од кои секој циркулира независно во одредени градови или држави, и се покажало дека кај ниту еден не е поголем ризикот од пренесување од лице на лице, во споредба со останатите.
Некои мутации кои често се јавуваат се сосема неутрални, а некои се благо штетни по самиот вирус, утврдиле научниците.
Некои од најчестите мутации се предизвикани со делувањето на имуниот систем кај заболеното лице, а не со обид на самиот вирус да се адаптира така што поефикаснода го “зарази“ домаќинот/пациентот, заклучиле научниците.
“Со оглед дека се бележат се поголем број на мутации, научниците забрзано се обидуваат да утврдат дали некои од нив може да го направат вирусот позаразен или посмртоносен отколку што веќе е, бидејќи “од клучна важност е тоа да се утврди што е можно порано“, вели д-р Франсоа Балу, директор на Институтот за гентика на Универзитетскиот колеџ во Лондон.
“Истражувавме дали новите, мутирани варијанти на вирусот имаат повисока стапка на пренесување и се покажа дека ниту една мутација која ја проучувавме, не оди во корист на вирусот“, вели д-р Балу.
Вирусите од фамилијата коронавируси, вклучувајќи го и овој новиот, мутираат на три начини.
До мутација може да дојде поради грешка при репликацијата на вирусот, потоа во интеракција со друг вирус кој ја инфицирал истата клетка, и под влијание на имуниот систем на заразеното лице.
Досега, благодарение на глобалните истражувања, идентификувани се речиси 7.000 мутации на вирусот ЅARS-Cov-2. Од оваа бројка, 300 мутации е докажано дека имаат способност да постојано се појавуваат, независно, во различни градови и држави.
За време на ова истражување, научниците ги проучувале геномите на вирусот кај над 15.000 пациенти заболени од КОВИД-19 во 75 земји. Тие се фокусирале на 31 мутација, кои самостојно се појавиле најмалку 10 пати, и се покажало дека ниту една од проучуваните варијации не одела “во корист“ на вирусот, туку биле или неутрални или го правеле вирусот послаб.
“Се очекува вирусот да продолжи да мутира и да се развива во различни линии, како ќе продолжи да се шири низ популацијата. Но, тоа не значи дека ќе стане поопасен ниту дека полесно ќе се пренесува“, вели д-р Луси ван Дорп, која работела на ова истражување.
