Научниците нашле нов орган преку кој луѓето чувствуваат болка, што би можело да доведе до развој на нови лекови против болки. Односно тврдат дека откриле посебни клетки кои ги опкружуваат клетките на нервите за чувство на болка и кои се шират кон надворешниот слој на кожата, а судејќи по се се поврзани со чувството на болка. Ова, пренесува Гардијан, е откритие кое укажува дека зад извикот „леле“ се крие нов орган.
Научниците велат дека ова откритие овозможува нов увид во болката и дека тоа би можело да помогне да најдат одговори на долгогодишните загатки.
– Најважното прашање за нас е дали тие клетки всушност се причина за одредени видови хронични болки, рекол за Гардијан коавторот на истражувањето, проф. Патрик Ернфорс од Каролинска институтот во Шведска.
Во текст објавен во магазинот „Сајенс“, пак, истражувачите откриваат дека ја испитувале природата на клетките во кожата кои, како што навеле, во голема мера биле занемарени. Се работи за вид на клетки „шван“ кои ги обвиткуваат и влегуваат во нервните клетки за да ги одржат во живот. Студијата открила дека „шван“ клетите имаат форма на октопод.
Откако го испитале ткивото, научниците пронашле група клетки под надворешниот слој кожа, но откриле и дека тие клетки имаат долги продолжетоци кои се обвиткуваат околу завршетоците на нервите за чувство на болка, кои продолжуваат во епидермисот, надворешниот слој на кожата. Научниците биле изненадени со откритието, затоа што долго се верувало дека завршетоците на нервните клетки во епидермисот се голи или немаат обвивка.
– Во областа на болката зборуваме за слободни нервни завршетоци кои се одговорни за чувството на болка, но тие всушност не се слободни, рекол Ернфорс.
Најголемото откритие на тимот научници е дека „шван“ клетките можат да чувствуваат болка. До откритието дошле со користење оптогенетика, која вклучувала генетско модифицирање на глувци, така што „шван“ клетките во кожата на нивните нозе произведуваат протеин кој може да впива светлина.
Научниците сметаат дека „шван“ клетките се важни за чувството на болка, барем кога станува збор за механички повреди и велат дека во суштина пронашле нов орган за чувство на болка.
