Британската агенција за храна UK Food Standard Agency своевремено ја лансирала кампањата „Go for Gold„, како би ја подигнала свеста за штетноста на загорената храна, заради соединението акриламид кој се создава при загорување на скробните намирници. Акриламидот се создава при пржење и печење, а според податоците на Светската здравствена организација, може да предизвика рак. Се наоѓа во многу видови храна и е природен продукт при процесот на загревање.
Највисоко ниво на акриламид е присутно во скробната храна која термички се обработува над 120 степени, како што се леб, снегулки, крекери, бисквити или кафе. Кога лебот се става во тостер, се произведува акриламид. Колку е тостот потемен, толку повеќе е присутно ова соединение.
Агенцијата за стандардизација на храната (FSA) препорачувала внимателно да се следат упатствата и да се избегнува храната да добие темна боја, односно да се води сметка да остане златна (Go For Gold).
Но, научниците по направените нови истражувања на глувци донекаде го ублажиле ставот за штетноста на акриламидот. Европската агенција за храна во соопштението навела дека треба да се биде внимателен кога добиените резултати на животни се пренесуваат на луѓето.
И понатаму стручњаците тврдат дека акриламидот и неговите метаболити ја оштетуваат ДНК и предизвикуваат карцином кај глувците, но и дека доказите кои покажуваат дека исто така делува и на луѓето, се ограничени и недоверливи. Велат дека има и полоши фактори за човековото здравје, а тоа се пушењето и загадениот воздух.
