Добрите бактерии кои живеат на нашата кожа може да помогнат во лекување на атопичен дерматитис, покажала новата студија. Овие резултати дополнително ја нагласуваат важноста на добрите бактерии на нашата кожа и во нашиот дигестивен систем, за нашето здравје.
Во оваа студија, бактеријата Roseomonas mucosa, која нормално живее на нашата кожа, била земена од кожата на здрави луѓе и нанесена на кожата на луѓе со атопичен дерматитис.
После неколку недели, дошло до ублажување на клиничката слика на атопичен дерматитис, па така некои пациенти повеќе немале потреба да земаат кортикостероидни креми за ублажување на својата состојба. Треба да се напомене дека кај пациентите кај кои бил применет овој нов метод на лекување на атопичен дерматитис не биле забележани никакви компликации од лекувањето.
Генерално, 6 од 10 возрасни пациенти и 4 од 5 деца, имале до крајот на истражувањето подобрување на симптомите на егзема за повеќе од 50 проценти.
Истражувачите веруваат дека овој нов метод на третман на егзема има потенцијал еден ден да стане стандардна терапија за милиони пациенти заболени од атопичен дерматитис.
Исто така, треба да се напомене дека хемиските соединенија познати како парабени, кои често се наоѓаат во производите за нега на кожата, може да го инхибираат растот на бактеријата Roseomonas mucosa, што упатува на тоа дека овие производи може да и пречат на кожата во одбраната од атопичен дерматитис, пишува „JCI Insight“.
