Препораките новата облека да се испере пред првото носење не се залудни ниту претерани – на тој начин се намалува ризикот од алергии и се намалува контактот со хемиските супстанци кои ја иритираат кожата, ја реметат работата на ендокриниот систем и неповолно влијаат на репродукцијата.
Од јануари 2017 година француската здравствена агенција Ансес спровела студија во која учествувале 30 пациенти со цел испитување на иритирачките супстанци во облеката и обувките. Истражувачите анализирале кои супстанци се наоѓаат во артиклите кои учесниците во истражувањето ги носеле, како и какви симптоми предизвикувале.
Анализите на околу 40 нови артикли укажале на присуство на нонилфенол, формалдехид, па дури и слабо истражени супстанци како парафенилен-диамин, кој, исто така, може да предизвика контактен дерматитис. За да се намали изложеноста на споменатите хемикалии, текстилни бои, но и бактерии и габички кои може да се најдат на облеката, особено ако била пробувана, важно е новите артикли пред првото облекување да се исперат.
