Љубител сте на луто, но не и на оганот во вашата уста? Колку пати сте изеле нешто луто, а потоа сте се покајале до бесвест?
Имено, лутата храна го добива својот интензивен вкус од капсаицинот, состојка која се наоѓа во лутите пиперчиња. А кога капсаицинот ќе се спои со вашите рецептори за вкус на јазикот одговорот е јасен: Оган! Лутата храна може да го зголеми нивото на енергија и да го забрза метаболизмот, па затоа добрата вест е дека можете да ја неутрализирате лутината со одредени намирници. Еве што треба да имате при рака, а што да одбегнувате.
Вода
Пиењето чаша ладна вода е природна реакција во моментот кога мислите дека устата ви гори. Меѓутоа, иако водата привремено го спречува чувството на топлина, таа всушност ќе го прошири капсаицинот на вашите усни и само ќе го продолжи целиот процес.
Млеко или јогурт
Млекото содржи казеин, протеин кој помага во разбивање на молекулите на капсицинот, а потоа буквално го измива. Токму затоа многу мексикански и индиски јадења се сервираат со некој вид на млечни производи. Колку повеќе содржи млечна маст, толку е подобар ефектот бидејќи мастите се мешаат со капсаицин и се раствораат.
Алкохол
Алкохолот би можел да помогне, но процентот на алкохол во тој случај би требало да биде многу висок – на пример, пивото нема да ви помогне многу. Текилата и вотката се покажале како успешни, но чашка алкохолен пијалак после секој залак не е најпаметна идеја.
Шеќер
Наједноставен начин на кој можете да ја „оладите“ устата е да ставите една лажичка шеќер (или мед) во устата. Држете извесно време во устата, а потоа плукнете – на вашиот јазик ќе се создаде слој, кој ќе го заштити од чувството на топлина.
Сладолед
Сладоледот е мешавина на млеко, шеќер и масти, што го прави совршен за ладење на устата и „гаснење на пожарот“.
Скроб
Оризот и лебот делуваат како крпа што ќе ги впие лутите вкусови од вашата уста. Овие и другите намирници кои содржат скроб создаваат бариера помеѓу вашата уста и капсаицинот – и токму затоа лутата храна често се служи со леб или ориз.
