Ракот на дебело црево е еден од водечките причини за смртност во светот со речиси два милиона новозаболени и еден милион смртни случаи годишно. Кај нас, според последните статистики од пред три години, годишно се евидентираат над 600 новозаболени со рак на дебело црево.
Ако на време се открие, ракот на дебело црево може да се излекува кај 9 од 10 случаи. Поради тоа е важно редовно да се прават превентивни прегледи.
Во земјава постои Национална програма за скрининг или рано откривање на рак на дебело црево со која се опфатени лицата со ризик фактори на возраст од 50 до 74 години, односно лица кои во семејството имале заболени од карцином или се жалат на проблеми и крварење во столицата и други симптоми.
Како најлесно се спречува рак на дебелото црево, објаснува проф. д-р Невен Љубичиќ.
“Иако зачестеноста е голема, карциномот на дебело црево е еден од карциномите кој навистина може да се превенира со правилна исхрана и здрав начин на живот. Иако постојат бројни причини кои може да доведат до појава на рак на дебелото црево, вклучувајќи ја и генетската предиспозиција, правилната исхрана со доволен внес на прехранбени влакна и избегнување на штетните навики како пушењето и претераното консумирано алкохол, навистина може да бидат голем чекор во борба против овој рак“, вели професорот.
Тој вели дека ракот на дебело црево е многу тивка болест која во телото може да се развива со години без видливи знаци. Но, ако се појават некои од симптомите подолу наведени, советува веднаш да се советувате со вашиот лекар бидејќи овие симптоми треба да се сфатат сериозно. Вашиот лекар треба да биде запознаен со симптомите и да ве упати воо понатамошните чекори.
СИМПТОМИ КОИ УКАЖУВААТ НА ВАЖНОСТА ЗА БРЗ ПРЕГЛЕД:
- Видливо крварење во столицата
- Промена на начинот на празнење на цревата (наизменична појава на запек и пролив, црна столица, тенка столица)
- Чувство на нецелосно празнење на цревата
- Појава на необјаснива анемија
- Повторувачка болка во стомакот и/или карлицата
- Ненамерно намалување на телесната тежина
