Научниците откриле дека големината на зениците драстично се менува кога сме принудени да правиме повеќе работи истовремено или сме соочени со неочекувани промени. Истражувачите од Универзитетот во Мисури анализирале како стресот влијае на умот на личноста затоа што, велат, најчесто се зборува за тоа како стресот влијае на телото, на пример, дека предизвикува проблеми со грбот.
„Ако се чувствувате лошо или нешто ве боли, докторите ќе ве прегледаат и ќе утврдат во што е проблемот. Но што е со менталното здравје? Многу луѓе прават повеќе работи во исто време, под стрес се, но засега нема некои параметри кои точно ја покажуваат менталната благосостојба на личноста“, вели водечкиот автор на студијата, доктор Јанг Хјуп Ким и додава: „Меѓутоа ние откривме дека големината на зеницата би можела да биде клуч за мерење на нечија ментална состојба, кога таа личност прави повеќе работи одеднаш.“
Имено, 36 волонтери биле следени со помош на технологија која ги следи очите додека седеле во симулирана фабричка сала на рафинерија на гас. Учесниците морале да одговорат на некои ненадејни промени, како аларм додека истовремено гледале во два монитора. Резултатите покажале дека за време на овие едноставни задачи, движењето на очите на учесниците било прилично предвидливо, но тоа се сменило кога се соочиле со ненадејни промени. Податоците биле споредени со податоците на НАСА за тоа како на астронаутите им се менуваат зениците како одговор на стресна ситуација. Комбинирајќи ги овие податоци, утврдиле дека големината на зеницата се менува кога човек е под стрес.
Во следната студија научниците сакаат да истражат дали и како се менува работата на срцето, мозокот и како мускулите реагираат на стрес. Инаку, претходното истражување покажало дека од 4 619 учесници, 74 проценти понекогаш се под толкав стрес што чувствуваат како да не можат да се изборат со тоа.
Ако сте под стрес еве куси совети, кои можат да ви бидат од помош:
- Вежбајте;
- Преземете контрола над ситуацијата кога е возможно;
- Побарајте поддршка од блиските луѓе;
- Одвојте време за себе;
- Поставете си реални цели;
- Одбегнувајте алкохол, цигари и кофеин;
- Помогнете им на другите;
- Бидете си приоритет;
- Бидете позитивни;
- Прифатете ги работите кои не можете да ги смените.
