Користите ли компјутер или мобилен повеќе од три часа дневно? Мошне е веројатно дека ќе имате некој од симптомите на она што се нарекува компјутерски вид. Најчести тегоби се главоболка, замаглен вид, црвенило и чешање на очите, како и проблеми со спиењето доколку компјутерот или мобилниот телефон ги користите пред спиење.
Колку овие проблеми се чести говори фактот дека 70-75 отсто од луѓето кои секојдневно се служат со компјутер имаат некои од симптомите. Конкретните причини за појава на овие тегоби се: потешко фокусирање на електронскиот екран, отсјајот, три пати помалку трепкаме додека гледаме во екранот, па очите се сушат и најважната причина, вештачкото сино светло кое го емитуваат екраните исклучително неповолно влијае на очите, сонот и на здравјето воопшто.
Синото светло продира се до ретината во задниот дел на окото и се шири полесно од другите видливи зраци на спектарот, па очите лесно се заморуваат и губат фокус. Ако на тоа го додадеме отсјајот на екранот, лошото осветлување и контрастот речиси е невозможно да се избегнат некои од споменатите проблеми.
Мерки на превенција
Поставете го мониторот на оддалеченост еднаква на должината на вашата рака, точно пред вас, а не од страна. Центарот на мониторот треба да биде под нивото на очите. Компјутерот никогаш нека не биде единствен и најсилен извор на светлина во просторијата.
Редовно трепкајте – на секој половина час трепнете десетина пати полека за очите да се навлажнат. Исто така, користете капки за очи без конзерванси.
Вежба 20-20-20 – На секои 20 минути 20 секунди фокусирајте некој предмет на оддалеченост од шест метри, оваа вежба ќе го намали напрегањето на очите при работа на близна.
Користете очила за компјутер кои покрај антирефлексен слој, имаат и заштита од сино светло и на тој начин ќе спречите напрегање на очите, главоболка и ќе го подобрите сонот.
