Ново истражување покажува дека меѓу 60 и 80 проценти од луѓето го лажат својот лекар во врска со тоа колку често вежбаат, колку пијат, што јадат, дали пушат – но и било што друго што би можело да биде „лошо„. Покрај ова, третина од луѓето не им кажуваат на лекарите дека не ги разбираат или не се согласуваат со препораките кои докторот им ги дава, покажува истражувањето на Универзитетот во Јута.
Главна причина поради која пациентите го лажат докторот, или не му даваат целосни информации, е дека не сакаат докторот да им „одржи лекција„.
“Повеќето луѓе сакаат лекарот да има добро мислење за нив. Се плашат дека докторите ќе ги осудуваат и ќе ги сметаат за луѓе кои не носат добри одлуки„, вели д-р Анџела Фејгерлин, авторка на студијата.
Работејќи на ова истражување со своите колеги д-р Фејгерлин открила дека повеќето пациенти од докторите кријат барем една од овие работи:
- Дека не ги разбираат упатствата кои докторот им ги дава
- Дека не се согласни со препораките кои им ги дава докторот
- Дека не се физички активни
- Како навистина се хранат
- Дали земаат некои лекови
- Дека не земале лекови според упатствата на лекарот
- Дека на своја рака земале некој лек
„Изненадена сум дека толкав број луѓе кријат информации„, вели другата авторка на студијата д-р Андреа Гарманкин. „Мораме да земеме предвид и дека учесниците во истражувањето можеби не кажале за што се ги лажеле лекарите, така што овој феномен е поприсутен отколку што мислиме„.
Авторките на студијата предупредуваат дека никако не треба да криете дури ни најситни детали од лекарот, бидејќи е важно докторот се да знае, за да може да ви даде соодветна терапија и најдобар совет.
„Ако лажете за тоа што јадете или дали земате некакви лекови, тоа може многу да го искомплицира вашето здравје, особено ако имате некоја хронична болест„, порачуваат двете докторки.
