Според зборовите на научниците од Универзитетот во Бристол, мрзеливите лица имаат поголеми шанси да заболат од депресија или некоја друга психичка болест. Тие истражувале како мрзеливоста влијае на организмот и дошле до заклучок дека таа може многу да го исцрпи организмот, што со тек на времето и се случува.
Истражувањата биле спроведени меѓу оние кои сакаат да се излежуваат – паралелно и кај возрасни и кај деца. Резултатите покажале дека само 35% од мажите и 24% од жените се физички активни, а тоа вклучувало вежби, шетање и домашни активности. Во истражувањето учествувале 3.500 ученици,кое покажало дека само половината од нив пешачеле до училиште, а минимален број од нив учествувале во спортски активности. Времето најчесто го поминувале во седечка положба и тоа неквалитетно – во просек четири часа дневно поминувале пред телевизор или компјутер.
Гојазноста кај децата најчесто е предизвикана токму од ваквиот начин на живот – пасивност и слаба физичка активност, на што често се додава и неправилна исхрана. Мрзеливоста, која докажано го исцрпува организмот, доведува до низа сериозни психички заболувања и пореметувања. Доколку мрзеливите деца израснат во мрзеливи луѓе, многумина од нив може да имаат проблеми на емотивен и деловен план, а научниците дошле до заклучок дека мрзеливите луѓе почесто заболуваат и од Алцхајмерова болест.
Сето ова може да се избегне со редовни физички активности. Доволно е минимално активирање – почнувајќи од пешачење до училиште или работа, доколку е тоа можно, или ограничување на времето поминато пред телевизор или компјутер. На тој начин, кај децата може да им се создаде навика која ќе ја продолжат и како возрасни, со што ќе си обезбедат поздрав живот и ќе го намалат ризикот од психички заболувања.
