Срцевите болести повеќе не се водечка причина за смрт во богатите земји, а водечкото место сега го има карциномот, кој, предупредуваат научниците, наскоро би можел да стане најголемиот светски убиец.
Во два обемни научни труда објавени во медицинското списание Лансет, се изнесуваат податоци за новата „глобална епидемиолошка транзиција“ меѓу различните видови хронични болести. Срцевите заболувања засега остануваат водечки причинител на смртноста кај средовечните луѓе во дел од светот, и на нив отпаѓаат 40 отсто од смртните случаи. Но ова повеќе не важи за земјите со високи приходи, каде што ракот сега убива двојно повеќе луѓе.
„Според направените истражувањата се покажа дека ракот беше втор најчест причинител на смртта во светот во 2017, и на тоа отпаѓаат 26 отсто од смртните случаи. Но како што стапката на срцевите болести опаѓа, карциномот би можел да стане водечки причинител за смрт во голем дел од светот за само неколку децении“, смета Жил Дагенес, професор во Универзитетот Лавал во Квебек, Канада.
Со истражувањето биле опфатени 160 000 возрасни лица од држави со високи, средни и ниски приходи. Тоа покажало дека веројатноста луѓето од посиромашните нации да добијат рак е просечно 2,5 пати пониска во споредба со жителите на побогатите држави. Земјите опфатени во трудот се: Аргентина, Бангладеш, Бразил, Чиле, Филипини, Индија, Иран, Јужна Африка, Канада, Кина, Колумбија, Малезија, Пакистан, Полска, Саудиска Арабија, Шведска, Танзанија, Турција, Обединеттити Арапски Емирати и Зимбабве.
