Меланија Трамп, сопругата на претседателот на САД, Доналд Трамп, беше оперирана во Националниот воен медицински центар „Walter Reed“ поради бениген проблем со бубрегот, соопшти Белата куќа. Кај Меланија Трамп (48) била успешно извршена емболизација на реналната (бубрежната артерија), и по завршување на интервенцијата немало дополнителни компликации. Таа се опоравува добро по операцијата.
Точната природа на состојбата на Меланија Трамп останува нејасна. Но нефролозите кои не биле поврзани со нејзиниот случај, изјавиле дека емболизацијата често се користи за отстранување на бенигни лезии познати како ангиомиолипоми.
Ангиомиолипоми се бенигни тумори на бубрегот, а ретко и на други органи. Точната причина за појавата на ангиомиолипомите не е позната, но се претпоставува дека за нивното формирање би можела да биде одговорна генетска мутација. Инаку, ангиомиолипомите се поврзани со генетска болест, која е позната како туберозна склероза.
Некои од знаците и симптомите кои може да се појават кај ангиомиолипоми се ненадејни болки во грбот, гадење, повраќање, анемија, хипертензија, хронична бубрежна болест и шок. Ангиомиолипомите се јавуваат почесто кај жените, а се дијагностицираат со компјутеризирана томографија (CT), магнетна резонанца (MRI) и ултразвук.
Лекувањето на ангиомиолипоми може да вклучува лекови како што е еверолимус или метод на емболизација. Кај некои пациенти е потребно отстранување на бубрегот.
Прогнозата за повеќето бенигни ангиомиолипоми е добра, меѓутоа, прогнозата се влошува како што се зголемува туморот со што се зголемува веројатноста за појава на крвавење. Кај ангиомиолипомите поголеми од 4 сантиметри има голем ризик од крвавење
Ангиоемболизација е постапка која се изведува така што во артеријата која го снабдува погодениот бубрег се инјектира посебна сунѓереста материја, која на крајот го затвора крвниот сад и со тоа го спречува дотокот на крв во погодениот бубрег, што истовремено доведува и до прекин на снабдувањето со кислород и други материи, кои им се потребни на туморските клетки за раст, наведува „CBS new“.
