Едукативно-стручното гласило на Македонското лекарско друштво – “Лекарски весник„, денес го одбележа излегувањето на 100. број. Овој весник повеќе од девет години нуди информации за различни достигнувања во здравството и за проблемите со кои се соочува медицинскиот кадар, а претставува и поддршка на нашите лекари во странство посочувајќи ја нивната успешна приказна надвор земјава.
“Голема радост претставува реакцијата од читателите на списанието, нивните позитивни коментари. Кога ќе видите отворено списание, кое го чита некој доктор, некој професионалец во својата област, верувајте чувството на задоволство е преголемо. Тоа значи дека целта е постигната и сме допреле до сите оние кои и ни биле цел“, истакна главниот и одговорен уредник на “Лекарски весник“, проф. д-р Елизабета Србиновска-Костовска.
Излегувањето од печат на 100. број на “Лекарски весник“ , според уредникот на весникот, Ана Брајовиќ-Гапо е потврда за неговата остварена мисија, како медиум со кој се отвори ново поглавје на најстарата асоцијација на доктори во Македонија – Македонското лекарско друштво.
“Лекарски весник во овие 100 изданија се етаблираше и како информатор и како едукатор за случувањата во медицината и здравството во земјава, но информираше и за случувањата во регионот и во светот. Со тогашниот претседател на МЛД, проф. д-р Јован Тофоски со заеднички сили успеавме неговата идеја за весник, за гласило, да ја реализираме во прв број на Лекарски весник. Почнавме срамежливо, но амбициозно. Денес зад себе, на страниците имаме илјадници текстови, информации, интервјуа со стручњаци, трудови, кои се доказ за нашиот континуиран развој и желба за квалитетен кадар, здрави граѓани и здрава нација“, потенцира на денешната свеченост, уредникот на весникот, Брајовиќ-Гапо.
