Студија финансирана од Cancer Research UK сугерира дека заболените од рак на дебелото црево може да имаат подобри резултати во зависност од тоа како примаат хемотерапија. Сега т.н “заштитна“ хемотерапија се дава по операција (во рок од три месеци од операцијата) и ја намалува можноста болеста да се врати.
Според новиот режим, пациентите треба да примаат хемотерапија шест недели пред оперативниот зафат, а по него уште 18 недели, со што имаат поголеми шанси да ја победат болеста, велат авторите на студијата.
Испитувањето FOxTROT го водеа универзитетите во Бирмингем и Лидс и опфатило 1.053 пациенти во 85 болници во Велика Британија, Данска и Шведска.
ЗА 28 ПРОЦЕНТИ
Резултатите покажале дека хемотерапијата спроведена пред и по операцијата го намалува ризикот од враќање на болеста за 28 отсто во рок од две години во споредба со групата која примала хемотерапија само по операцијата.
За време на траењето на студијата, првата група примала хемотерапија шест недели пред операцијата, а потоа 18 недели по неа. Втората група се лекувала по вообичаената постапка за хемотерапија, во текот на 24 недели по операцијата. Резултатите покажале дека пациентите кои примале хемотерапија и пред операцијата имале помали шанси за враќање на ракот. Научниците веруваат дека таков пристап би можел да биде прифатен во Велика Британија и во целиот свет во корист на стотици илјади пациенти кои страдаат од оваа форма на рак секоја година. Д-р. Лаура Магил, професорка која учествувала во клиничкото испитување во Бирминген вели дека “еден од тројца пациенти со рак на дебелото црево може да се соочи со рецидив по операцијата. Тој број е превисок и треба да прифатиме нови стратегии за да го спречиме враќањето на ракот на дебелото црево“.
Во испитувањето, 699 пациенти примиле хемотерапија пред операцијата.
Професорот Метју Сејмур од Универзитетот во Лидс истакнува дека “времето е сè кога е во прашање лекувањето на ракот на дебелото црево“.
“Хемотерапијата пред операција може да спречи повторување на карциномот без употреба на скапи нови лекови или технологии“.
“Посебно е охрабрувачки што пациентите кои примале хемотерапија пред операцијата имале помалку оперативни компликации“, вели проф. Сејмур, кој верува дека “таков третман, доколку се прошири во светот, вклучително и во земјите со низок и среден приход, може да спаси илјадници животи“.
Околу два милиони пациенти со рак на дебелото црево се дијагностицираат секоја година, според податоците на Светската здравствена организација, со што оваа форма на карцином е трета најчеста во светот. Истражувањето е објавено во списанието Journal of Clinical Oncology.
