Ова е период од годината кога сите почнуваме да размислуваме како да ја доведеме “линијата“ во ред. Сега се мисли на пролетта и преминувањето на облека која ги открива наталожените килограми, бидејќи во последен момент и не може многу да се постигне. Затоа ова е вистински момент да превземете некои чекори кои што ќе ви помогнат првите сончеви денови да ги дочекате задоволни со изгледот и поздрави од било кога. И ако не сте љубител на диети и сакате да се држите до вашата вообичаена исхрана само со помали количини на храна или веќе сте започнале со некаков режим на исхрана, во вашата програма на исхрана можете без проблем да уфрлите и смуди за слабеење. Тоа со своите состојки ќе го поттикне и забрза процесот на слабеење, а може да се консумира и како нискокалорична, а сепак нутритивно вредна замена за некој оброк. Исто така е одличен начин во исхраната да воведете повеќе овошје и зеленчук, да се хидрирате и освежите.
СМУДИ ОД БАНАНА И ОВЕСНИ СНЕГУЛКИ
За подготовка на ова смуди доволни се само неколку минути, но треба да се направи еден ден претходно и да се остави да отстои преку ноќ. Овесните снегулки изобилуваат со влакна кои го подобруваат варењето, ја намалуваат надуеноста и создаваат чувство на ситост после оброк. Содржат витамини Е, Б1 и Б2, како и минерали калциум, калиум, магнезиум, цинк, селен, бакар, силициум и манган, но и фитохемикалии со антиоксидантно дејство. Овесните снегулки совршено се комбинираат со бадемово млеко, кое е многу богато со хранливи материи, а поради ниската калорична содржина е одлична замена за кравјото млеко за секој кој сака да ослабе и да одржи идеална телесна тежина.
СОСТОЈКИ:
- Половина чаша овесни снегулки
- 1 лажица чиа семе
- 200мл бадемово млеко
- 1 лажица органски мед
- 1 зрела банана
ПОДГОТОВКА: Во сад ставете малку вода и во него додадете ги овесните снегулки и чиата и се заедно убаво измешајте. Со нож израмнете ја површината и ставете го садот во фрижидер да отстои преку ноќ. Следното утро ставете ја смесата во блендер, додадете ги преостанатите состојки се добро измешајте и напивката за слабеење е готова.
