Подваријантите на омикрон ВА.4 и ВА.5 ги избегнуваат антителата и кај лица кои имале претходна инфекција со КОВИД-19 и кај оние кои биле целосно вакцинирани, вклучително и со бустер доза, покажале новите истражувања од Медицинскиот центар Beth Israel Deaconess кој е дел од Медицинскиот факултет Харвард.
Меѓутоа, се уште се очекува дека вакцинацијата против КОВИД-19 ќе овозможи значајна заштита од потешки заболувања. Производителите работат на унапредување на вакцина која би можела да поттикне посилен имунолошки одговор на овие варијанти.
Според новото истражување објавено завчера во New England Journal of Medicine, нивоата на неутрализирачки антитела што ги предизвикува претходна инфекција или вакцинација, се неколку пати пониски кај подваријаната ВА.4 и ВА.5 во споредба со изворниот коронавирус.
“Забележавме тројно намалување на титарот на неутрализирачките антитела предизивкани од вакцинација и инфекција против ВА.4 и ВА.5 во споредба со подваријантите ВА.1 и ВА.2, кои се веќе значајно пониски од изворните варијанти на вирусот“, објаснува д-р Ден Баруч, автор на трудот и директор на Центарот за вирусологија и истражување вакцини во Медицинскиот центар Beth Israel Deaconess во Бостон.
“Нашите податоци упатуваат на тоа дека постои можност да новите омикрон подваријанти доведат до пораст на инфекциите и кај популацијата со високо ниво на имунитет добиен со вакцина, како и оние со природен имунитет на ВА.1 и ВА.2“, потенцира д-р Баруч.
“Меѓутоа, веројатно имунитетот стекнат со вакцина и понатаму ќе обезбедува значајна заштита од потешки болести кај оние заразени со подваријантите ВА.4 и ВА.5“, додава тој.
Неодамна објавени наоди го поддржуваат одвоеното истражување на научниците од Универзитетот Колумбија.
Тие неодамна открија дека е поголема веројатноста да вирусите ВА.4 и ВА.5 ги избегнат антителата во крвта на целосно вакцинрианите возрасни лица и оние со бустер доза, во споредба со другите подваријанти на омикрон, што го зголемува ризикот од инфекции со КОВИД-19 кои што го пробиваат имунитетот.
Авторите на одделната студија велат дека нивните резултати упатуваат на поголем ризик од повторна инфекција дури и кај лица кои претходно стекнале имунитет.
Американскиот центар за контрола и превенција на болести проценува дека 94,7 проценти од американската популација на возраст од над 16 години создале анититела со вакцинација, инфекција или на двата начина.
ВА.4 и ВА.5, минатата недела во САД предизвикаа околу 35 отсто од новите инфекции со ковид во однос на 29 отсто неделата пред тоа, според податоците кои во вторникот ги објави Американскиот центар за контрола и превенција на болести.
ВА.4 и ВА.5 се подваријанти кои досега најбрзо се шират, а според Европскиот центар за превенција и контрола на болести се очекува да во следните неколку недели доминираат кај ковид заразата во САД, Велика Британија и во остатокот од Европа.
