“Сега постојат цврсти докази дека омикрон се шири многу побрзо од делта варијантата“, изјави првиот човек на Светската здравствена организација, Тедрос Аданом Гебрејесус на конференцијата за новинари во Женева.
“И поголеми се шансите за инфекција или за повторна инфекција кај лица кои се вакцинирани и оние кои се опоравени од КОВИД-19“, додаде тој.
Главниот научник на СЗО, Соумја Сваминатан изјави дека омикрон варијантата успешно избегнува некои одговори на имуниот систем, што значи дека бустер дози вакцини треба да им се даваат на лица со послаби имуни системи.
Омикрон се чини дека подобро ги избегнува антителата чие создавање го поттикнуваат вакцините, но постојат и други форми на имунитет кои можат да спречат зараза и болеста, истакнуваат стручњаците од СЗО.
“Не веруваме дека сите вакцини ќе станат целосно неефикасни“, изјави Сваминатан.
Експертот на СЗО, Абди Махамуд додава: “Иако гледаме намалување на бројот на неутрализирачки антитела, речиси сите податоци покажуваат дека Т-клетките остануваат непроменети, а тоа навистина ни е потребно“.
Т-клетките може да спречат тешки форми на болеста, напаѓајќи ги заразените клетки.
Сваминатан додава дека се уште е многу рано за да може да се донесе заклучок дека омикрон варијантата е поблага од останатите варијанти на коронавирусот и предупреди дека е можно да дојде до преоптоварување на здравствените системи.
“Веројатно не е паметно да се опуштиме и да мислиме дека ова е блага варијанта, дека нема да предизвика тешка болест, бидејќи мислам дека со оглед на како бројот на заразени се зголемува, сите здравствени системи ќе бидат под притисок“, вели таа.
Таа објасни дека перцепцијата дека омикрон е поблаг сој се темели на почетните податоци од делови на Јужна Африка, кои би можеле да бидат залажувачки, бидејќи населението таму веќе во огромен процент се заразило со коронавирус и стекнало одреден имунитет.
Експертите од СЗО истакнаа дека надеж за крај на пандемијата буди развојот на втора и трета генерација на вакцини, понатамошен развој на лекови и други иновации.
