Нови инфекции со новиот сој на коронавирусот – омикроб, поттип ВА.5, се се почести. Светската здравствена организација (СЗО) веќе го идентификуваше овој подтип на сојот омикрон како “загрижувачки“. Германскиот институт Роберт Кох со ова смета дека поттипот ВА.5, како и другите поттипови на сојот омикрон, брзо ќе се шири, бидејќи тие полесно се пренесуваат отколку делта сојот. Институтот предупредува на опасност на зголемување на бројот на инфекции веќе во текот на летото.
“Моментално, најголем пораст покажуваат поттиповите ВА.4 и ВА.5“, објави Институтот на 9.јуни. Од ова, експертите од Роберт Кох, изведоа заклучок дека овие два поттипа на сојот омикрон многу брзо може да ги предизвикаат поголемиот процент на нови зарази. Веќе сега на поттипот ВА.5 отпаѓа 10 отсто од инфекциите. Тоа е двојно повеќе отколку на почетокот на јуни.
BA.5 првпат се појави во Јужна Африка
Уште на почетокот на мај, подвидот BA.5 предизвика загриженост во Јужна Африка. Бранот, сепак, беше послаб од претходните поттипови и веќе е во опаѓање. Во Португалија, пак, новиот подвид BA.5 е одговорен за 80 отсто од новите инфекции. Овој досега непознат подвид е позаразен од претходните поттипови на омикрон. Него, неутрализирачките антитела не го препознаваат толку добро и затоа се шири побрзо. Но, текот на болеста е поблаг отколку кај делта сојот.
Штити ли бустер-вакцината од инфекции со поттиповите на омикрон?
Заштитата од вакцина против коронавирус слабее со текот на времето, бидејќи количината на антитела се намалува. Истото важи и за лицата кои прележале КОВИД-19. Така, ниту вакцинираните, ниту оние кои прележале корона, немаат оптимална заштита од поттипот на сојот омикрон и можат да се заразат. Поттипот BA.5 веќе се прошири во голем број земји, како што е Португалија, каде што бројот на нови инфекции нагло се зголеми во последно време.
Затоа, нови инфекции со поттиповите на сојот омикрон се можни и покрај вакцинацијата или прележаниот КОВИД-19 и се појавуваат почесто отколку инфекциите со делта сојот.
Но, има помалку смртни случаи и помалку лица кои мораат на болничко лекување. Стручњаците сметаат дека причината е во фактот што голем број луѓе се веќе вакцинирани и имаат антитела, иако нивната количина со тек на времето се намалува. Општата имуност е поголема отколку на почетокот на пандемијата. Сепак, Институтот Роберт Кох им препорачува на ризичните групи и повозрасните лица повторно да се вакцинираат со бустер доза, за да ја зголемат количината на антитела.
Повеќе инфекции, помалку смртни случаи
Вакцините што се даваат насочени се кон сите видови на spike-протеинот кој беше активен на почетокот на пандемијата. Но, вирусот во меѓувреме толку се промени да антителата не реагираат толку добро на вакцината. Се создаваат помалку антитела и вирусот може полесно да се прошири.
Но, новите соеви, па така и поттипот на омикрон ВА.5, се чини, се помалку опасни. Една теорија е дека тој вид брзо и интензивно ги напаѓа горните делови на дишните органи, но дека поретко продира до белите дробови. Поради тоа и помалку луѓе умираат. На почетокот, белите дробови почесто и посилно беа напаѓани, што доведуваше до поголем број смртни случаи.
Заштита од инфекции со омикрон
Времето помеѓу инфекцијата и појавата на првите симптоми, при инфекција со сојот омикрон е околу три дена, што е помалку отколку при зараза со делта сојот. Заштитата што ја нудат досегашните вакцини не е оптимална, но сепак штитат од потешко заболување. За тоа, се претпоставува, доволна е основна имунизација. Вакцинацијата со бустер доза помага повторно да се создаде поголема количина на антитела. А тоа обезбедува подобра заштита.
Иако сојот омикрон со сите поттипови обично има полесен тек на болеста од делта, во ретки случаи сепак може да се појават тешки симптоми. А се уште не е јасно какви долгорочни последици може да има инфекцијата со омикрон сојот на коронавирус.
