Најновите лабораториски експерименти покажале дека честичките на омикрон може да преживеат на разни површини и притоа се заразни подолго од честичките на оригиналниот вирус SARS-CoV-2.
Истражувачите, во рамките на студијата, на различни површини на собна температура накапале капки од заразниот вирус од оригиналната верзија на коронавирусот и капки на омикрон варијантата ВА.1.
Утврдиле дека на мазни површини, како стакло, нерѓосувачки челик и пластични плочи, омикрон бил заразен дури и по една недела, додека честичките на оригиналниот SARS-CoV-2 четвртиот ден веќе не биле заразни кога се задржале на нерѓосувачки челик и пластични плочи, односно седмиот ден на стаклени површини.
Резултатите од истражувањето се објавени на интернет страницата bioRxiv, кое се уште не поминало стручна рецензија.
На салфетка и хартијата за печатење, оригиналниот вирус повеќе не бил заразен по 30 минути. Омикрон се покажал заразен дури и по 30 минути, но не по еден час, покажале наодите.
Во најголем број случаи, SARS-CoV-2 се пренесува преку воздух и респираторни капки, а инфекцијата преку контакт со контаминирани површини е ретка.
Новата студија “ја нагласува важноста на хигиената на рацете и чистењето на површините кои редовно ги допираат различни луѓе“, вели коавторот на студијата Лео Пун од Универзитетот во Хонг Конг. Посебно внимание треба да се посвети на хигиената на површините контаминирани од лице заразено со КОВИД-19.
