Спирулината е алга која го поткрева имунитетот, го чисти организмот, ја поправа крвната слика и има благотворно дејство врз целиот организам. Таа е еден од најстарите жители на нашата планета, има модрозелена боја. Во езерата и океаните живее повеќе од три милијарди години. Во некои делови од светот е позната и како ’зелена крв’ затоа што го чисти организмот и ја поткрева енергијата.
Многу древни народи ја користеле за лекување. Старите Ацтеки од неа правеле колачи. Денес најмногу се одгледува во Кина, Австралија и на Хаваите. Кина со неа ја снабдува половината од светскиот пазар, па е прогласена за намирница од национален интерес. Благодарение на високото ниво на протеини се користи и во случаи на неухранетост, особено кај децата во сиромашните земји.
Позната е како најбогат извор на бета каротен, затоа што го содржи 10 пати повеќе од морковот. Освен тоа е и комплетен протеин, што значи дека ги содржи сите девет есенцијални масни киселини. Богата е и со витамини и минерали. Една дневна доза спирулина во прав содржи повеќе железо од две шолји спанаќ. Стандардната дневна доза е 5 грама, но може и да се зголеми во зависност од годините и тежината.
Ги штити нервите и видот
Содржи зеаксантин – силен антиоксидант благотворен за нервниот систем и очите. Делотворна е и кај труење со тешки метали затоа што ги врзува, а потоа го потпомага нивното исфрлање од телото. Ефикасна е и против штетното зрачење.
Го потпомага слабеењето
Ја олеснува борбата со килограмите, затоа што брзо создава чувство на ситост. Ја дава потребната енергија, а не содржи шеќер. Меѓутоа стручњаците предупредуваат дека диетата не смее да се базира исклучиво на спирулина затоа што таквиот режим не е здрав и не дава долгорочни резултати, а прекумерното внесување може да ги оштети бубрезите и црниот дроб.
Ја поттикнува детоксикацијата
Бета каротенот е најделотворен нутритиент во борбата против слободните радикали кои ги оштетуваат клетките, го забрзуваат стареењето и го зголемуваат ризикот од малигни болести. Благодарение на оваа состојка спирулината има својство да ги елиминира токсините од крвотокот. Им се препорачува на поранешните алкохоличари и пушачи заради исфрлање на наталожените отрови. Позната е и како одлична превентива од воспалителни болести, особено ревматоиден артритис. Благодарение на детоксикациските својства се користела во поранешниот СССР после нуклеарната катастрофа во Чернобил.
Го јакне имунитетот
Како вистинска протеинска бомба идеална е за вегетаријанците и веганите. Истражувањата потврдиле и благотворно влијание на човековото здравје, особено во јакнењето на имунитетот, забрзувањето на метаболизмот, намалувањето на холестеролот и стабилизирањето на шеќерот во крвта. Нутриционистите особено им ја препорачуваат на спортистите, трудниците и личностите со ослабен имунитет. Светскиот рекет број еден, Новак Ѓоковиќ ги открил благодатите на оваа алга и, како што вели, таа е мошне важен елемент во неговата исхрана. Ѓоковиќ вели, дека секојдневно ја консумира, а токму тоа му давало повеќе сила.
