Лимфниот систем е важен дел од имунолошкиот систем на организмот, тоа е одбранбен систем на организмот против различни болести. Лимфните жлезди се дел од лимфниот систем, во нив се филтрира лимфната течност, тука се задржуваат и концентрираат вирусите, бактериите и друг туѓ материјал за на крај да ги уништат со помош на посебни бели крвни клетки наречени лимфоцити и макрофаги.
Зголемени лимфни жлезди не се ретка појава. Може да бидат последица на обична настинка или други вирусни инфекции. Но, не треба да се занемаруваат, бидејќи може да бидат и симптом на сериозно заболување како што е тумор.
Зголемувањето на едно место настанува тогаш кога постои здравствен проблем: инфекција, повреда или тумор во близина или во лимфните жлезди. Некогаш, во исто време можат да бидат зголемени лимфни жлезди на повеќе места на телото.
Во детската возраст најчесто се зголемени лимфните жлезди во пределот на вратот, што зборува за постоење здравствен проблем во предел на усната шуплина, носот, грлото, синусите или меките ткива на лицето и вратот. Најчесто се тоа вирусни инфекции предизвикани од респираторни вируси и бактериски инфекции на горните дишни патишта и крајниците (ангина, воспаление на лигавицата на носот, гркланот, синусите, воспаление на увото, забен кариес, воспалителни процеси на непцата).
Дијагнозата во типичните случаи лесно се поставува врз основа на податоците од родителот за тегобите на детето, прегледот на детето и рутински биохемиски иследувања (леукоцити и леукоцитна формула). Дополнителни иследувања за утврдување на точната дијагноза се потребни:
- Ако зголемената жлезда не се повлекува по неколку недели од нејзината појава;
- Ако дојде до зголемување на истата во однос на претходните денови;
- Ако жлездата стане потврда по конзистенција, болно осетлива на допир или неподвижна (да не „бега“ под прстите на допир);
- Ако постојат други придружни симптоми на болеста: болно и чувствително грло, продолжена носна секреција, кашлица, зголемена телесна температура;
- Ако постојат промени во општата состојба: намален апетит, губиток на телесна тежина, малаксалост, замор, ноќно потење, вклучувајќи и чешање по кожата;
- Ако се појавуваат модринки по телото без претходен удар.
