Периодот од 40 дена или шест недели после породувањето е период во кој жената се опоравува од бременоста, па доживува различни промени. Крвавење, доење, болки и многу емотивни промени.
Колку долго ќе крвавам? Вагиналното крвавење може да трае до шест недели по породувањето, но кај повеќето жени ќе престане порано. Во првите неколку дена крвта ќе биде светлоцрвена и отприлика ќе изгледа како менструација. Можно е да се појават и поголеми згрутчувања кои ќе се појават откако ќе се поместите од седечка или лежечка положба, што е сосема нормално, иако треба да следите што се случува во овој период. Крвта се собира во вагината кога сте во една положба, а нагло излегува кога ќе се смени положбата.
Меѓутоа, ако вашата влошка е потполно натопена, односно ако тоа се случува за помалку од еден час важно е да побарате лекарска помош. После три до четири дена (после породувањето) крвавењето треба полека да слабее, па ќе стане воденесто и со розикава боја. Од осум до десет дена после породувањето исцедокот полека ќе станува жолтеникаво-бел. Ако се случи повторно да стане црвен и мошне густ, вашето тело можеби ви порачува дека сте претерале и дека треба да одморите. Крвавењето кое е силно и во црвена боја и е подолго од една недела е невообичаено и обавезно побарајте совет од лекар.
Дали згрутчувањата за време на крвавењето се нормална појава? Повремени „мали“ згрутчувањата се сосема нормални, под поимот мали се мисли на оние со величина на кованица. Згрутчувањата се со темноцрвена боја и во желатинска форма. Откако ќе се појави згрутчување следете што ќе се случува понатаму со вашето тело и какво ви е крвавењето. Ако влошката е потполно натопена, односно ако тоа се случува за помалку од еден час важно е веднаш да побарате лекарска помош или да појдете во ургентен центар. Иако се случува мошне ретко, но дел од постелката може да остане во матката и после породувањето. Откако ќе помине оваа фаза на крвавење, исцедокот ќе биде посветол и нема да биде толку густ. Следете што се случува со вашето тело за да избегнете тешки крвавења или инфекции.
Како да се грижам за шевовите? Се разбира, немаат сите жени шевови после вагинално породување, но ако имате тие треба да бидат чисти и суви за да се намали можноста од инфекции. Користете шише со топла вода за полесно да се „средите“ после физиолошка потреба. Ако вашите шевови ве печат додека мокрите обидете се да се прскате со вода за време на мокрењето, така ќе ја ублажите болката, а потоа лесно тапкајте со перничиња од газа за да го исушите тоа подрачје. Пијте доволно вода така урината ќе биде поблага и помалку ќе ве боли. Урината би требало да биде безбојна, а не жолта.
Намалување на отоците: Ако вашите вагинални делови се отечени, можете да ставите некое ледено пакување на тој дел. Некои жени ставаат вода во пластични кесички, па тоа го користат како ледено пакување. Се разбира, дека треба да бидете нежни и ова да го правите преку некоја ткаенина.
Чистење на шевовите: Можете да ги натопите со топла вода два до три пати на ден. Тоа ќе помогне да останат чисти, но и циркулацијата во тие делови од телото да биде побрза, што ќе значи и побрзо опоравување. Олеснете си го седењето, ако многу ве боли обидете се да седите на округла перничка на дување или од пешкир или некое друго меко ќебе сами направете некој облик кој ќе ви го олесни седењето. За неколку недели повеќето шевови ќе исчезнат, но внимавајте на себе за опоравувањето да биде што е можно побрзо.
Смеам ли да земам таблети против болка? После вагинално породување може да имате три вида на болка: од раната, раздеротина и епизиотомија, нормална болка од породувањето и од хемороидите. Се разбира, можеби сте среќничка која не почувствувала ништо од ова. Некои рани се мошне мали и нема да ги почувствувате, освен што ќе предизвикаат непријатност. За поголемите рани и од епизиотомија ќе треба повеќе време за потполно опоравување. Можеби ќе требаат и лекови против болка за првите неколку дена. Повеќето такви лекови не пречат во доењето, а можете и да се посоветувате со лекар. Можно е да чувствувате и грчеви во матката, а тоа е потполно нормално затоа што после породувањето матката се враќа во првобитната положба. Грчевите најсилно се чувствуваат неколку дена после породувањето, но потоа почнуваат да се намалуваат. Кога доите се ослободува хормон кој, исто така, предизвикува грчење на матката. Иако тоа чувство можеби ви е непријатно, помага да го задржите крвавењето под контрола. Хемороидите може да се појават за време на бременоста и во периодот после породувањето. Топли бањи може да делуваат смирувачки, а, секако, и различните креми кои можат да ја смират болката и да ги намалат хемороидите. Ако имате големи проблеми, појдете на лекар.
Ќе се повредам ли кога ќе ја имам првата столица? Ќе пукнат ли моите шевови? Жените често се преплашени заради помислата за првата столица после породувањето, но и болката која може да ја очекуваат заради раната. Пијте доволно течности и консумирајте храна полна со влакна за вашата столица да биде помека. Понекогаш може да помогнат и препаратите кои ќе ја омекнат столицата.
