Периодот од 40 дена или шест недели после породувањето е период во кој жената се опоравува од бременоста, па доживува различни промени. Крвавење, доење, болки и многу емотивни промени. Во продолжение следуваат дел од најчесто поставуваните прашања од новите мајки:
Кога ќе можам да дојам? Кога ќе ми надојде млекото? Млекото ќе дојде штом вашето дете ќе се роди. Првото млеко се вика колострум. Тоа е ретка жолтеникава течност која доаѓа во мали количества, совршена е за малото бебе и неговото мало стомаче. Колострумот е полн со антитела и елементи кои се важни за здравјето на бебето. Некаде околу третиот ден после породувањето ќе забележите дека дојките стануваат потешки, што значи дека се менуваат својствата на млекото. Бојата ќе биде поразлична, од златна до бела, а и количествата кои ќе се произведат ќе бидат поголеми.
Треба ли да бидам на посебна исхрана додека дојдам? Нема посебен вид на исхрана додека го доите своето дете. Здравата исхрана е единственото на што треба да посветите внимание. Сигурно ќе слушнете многу совети од пријателките или членовите на семејството. Постојат и многу бабини приказни. Се препорачува внесот на кофеин да се ограничи, не повеќе од една до две шолји дневно. Премногу кофеин во вашето тело може да го направи бебето нервозно.
Зошто се чувствувам толку емотивно? Жените така се чувствуваат после породувањето. Понекогаш тоа се емоции кои се очекувани: љубов, среќа, еуфорија. Меѓутоа понекогап може да се јават чувства кои не сте ги очекувале. Многу жени чувствуваат рамнодушност, незадоволство или разочарување. Некои се плашат да признаат дека немаат посебни емоции за своето чедо. Да се добие дете е неверојатно искуство, но нема вистински одговор што точно треба да чувствувате. Таквото размислување може само да ве повлече кон негативни чувсрва. Ако не чувствувате поврзаност со своето бебе оставете времето да помогне. Дајте си време кое ви треба да си ја повратите силата и грижете се за себе и своето дете. Да се грижиш за новороденче не е лесно. Со недостаток на сон, овој период во животот на секоја жена е погоден таа да се чувствува анксиозно и депресивно. Постпородилната тага е вообичаена во првите недели. Ако таквите чувства потраат повеќе од неколку недели можно е да патите од постпородилна депресија и најдобро е да се обратите на лекар и да разговарате со блиските.
Како ќе знам дали сум добила инфекција? После вагинално породување најчести места на кои се развива инфекција се шевовите, матката и меурот. Првите знаци на инфекција на шевовите се зголемена болка која не се намалува без оглед на тоа што времето минува или што земате лекови против болка. Црвеникавата кожа околу шевовите, задебелувањата или зеленкавиот исцедок, исто така, се знаци на кои треба да се посвети внимание. Исцедок со непријатен мирис од вагината, болка во пределот на карлицата и температура можат да бидат знак дека имате воспаление на матката. Мирисот би требало повеќе да биде сличен на вашиот мирис кога имате менструација. Телото на жените е мошне чувствително кога поминува низ бременост и породување, па и меурот е чувствителен. Симптомите кои може да укажуваат на тоа се: чувство на печење додека мокрите, често морате да одите во тоалет… Иако не заборавајте дека е нормално да чувствувате печење околу шевовите кога мокрите. Важно е да се нагласи дека ако добиете температура во првите шест недели веднаш да посетите лекар. Во тој чувствителен период овие симптоми не треба да се занемаруваат.
Кога повторно можам да имам секс? После породувањето и привикнувањето на малото бебе, сексот сигурно не ви е на листата приоритети. Меѓутоа добро е да се знае кога телото е спремно за враќање. Општа препорака е дека треба да се чекаат шест недели пред овој чин, затоа што телото се уште е мошне чувствително, а и постои поголем ризик за развој на инфекции. Вашата матка мора да зацели. А потребно е и време за шевовите и раните да зацелат и тој дел од телото да се опушти.
