Како последица од удар во главата може да се јави функционално пореметување кое се карактеризира со минливо губење на свест, а се дијагностицира како потрес на мозокот. Потрес на мозок кој не е проследен со структурна повреда на мозокот, нема да остави сериозни невролошки последици. Веднаш по повредата состојбата се карактеризира со губење свест, потење, вртоглавица, главоболка, бледило, мачнини и повраќање.
По повредата губењето свест трае неколку минути, а по враќањето на свеста, болниот не се сеќава на повредата. Откако болниот ќе се освести, свеста му е поматена, исплашен е, зашеметен и возбуден. Подоцна нема да се сеќава ниту на состојбата во која бил по враќањето на свеста.
После задобиениот потрес на мозокот, пациентот мора да мирува. Претходни препораки биле дека пациентот треба да избегнува физички активности и тренинзи, додека не исчезнат сите симптоми. Но, неодамна е докажано дека пациентите кои се враќаат на вежбање после седум дена од повредата, без оглед на своите симптоми, главоболката им исчезнува побрзо, која вообичаено трае до еден месец.
Пациентите секако не смеат да се вратат на своите активности кои би можело да бидат ризични за повторно да ја повредат главата, на пример контактните спортови или било кои други активности пред да им дозволи лекар. Но, некои лесни активности како пливање, одење и возење статичен велосипед секако се препорачуваат бидејќи се покажале како корисни.
Во заклучокот од последните истражувања на оваа тема се наведува дека пораното враќање на физичките активности по потрес на мозокот и повреда на главата, ги ублажува долгорочните симптоми, и ги намалуваат несаканите последици од губење на менталната, како и физичката кондиција.
