Речиси секое седмо лице кое е тестирано позитивно на КОВИД-19 чувствува симптоми и три месеци подоцна, покажуваат новите податоци од Велика Британија.
Најголемата студија за долгиот КОВИД-19 на Агенцијата за национална статистика во Британија открила дека лицата со коронавирус многу почесто од општата популација пријавуваат здравствени проблеми, кои може да вклучуваат болка во мускулите и замор.
На прмерок од над 20.000 лица кои биле позитивни на КОВИД-19 помежу април 2020 и март оваа година, 13,7% продолжиле да чувствуваат симптоми најмалку 12 недели. Тоа било осум пати повеќе отколку во контролната група луѓе за кои е малку веројатно дека имале КОВИД-19, наведуваат од Агенцијата.
Од оние кои биле позитивни, една петтина или 21% и натаму имале симптоми на коронавирусот, пет недели по тестирањето.
Жените почесто пријавувале долг КОВИД-19 од мажите, 14,7% во споредба со 12,7%, а најголем број од нив биле на возраст од 25 до 34 години. На поголем примерок лица со или без тестови на ковид, Агенцијата проценила дека 1,1 милион лица се соочиле со долгтораен КОВИД-19 траење од четири недели, до 6. март.
Од тој број, околу 697.000 лица прв пат имале КОВИД-19 или мислеле дека се заболени најмалку 12 недели претходно, додека 70.000 лица прв пат се соочиле со вирусот или мислеле дека се заразиле пред една година.
Проценето е дека долгиот КОВИД-19 негативно влијае на секојдневните активности на 674.000 лица, додека 196.000 пријавиле дека многу ги ограничува во извршувањето на секојдневните активности.
Од оние кои сами пријавиле долготраен КОВИД-19, најмногу се погодени оние на возраст од 35 до 69 години, како и жени, лица кои живеат во најсиромашните подрачја, вработени во здравство или социјална заштита, како и оние со коморбидитети.
И Светската здравствена организација излезе со став дека товарот на долготрајниот КОВИД-19 е “реален и значаен“.
