Голем број нутриционисти, доктори и здравствени работници ќе ви кажат дека целосното исфрлање на одредени видови намирници од исхраната, со исклучок на нетолеранција, може да му наштети на здравјето, пишува Индепендент.
И покрај фактот што во последно време е забележана промена од т.н. „clean eating“ (чисто јадење), многу луѓе и понатаму имаат тенденција да консумираат безглутенски производи, нерафиниран шеќер, да избегнуваат месо, млечни производи и сите видови на преработена храна, без оглед на тоа што не се алергични на нив.
Добро е да се промовира здравата исхрана, но не треба да се претерува. Здравата исхрана подразбира умереност во храната, а не опседнатост со неа
Но кога таквиот начин на здрава исхрана ќе прерасне во опсесија, се нарекува орторексија (ortorexia nerviosa), нарушување во исхраната, кое подразбира прекумерна преокупација со здравата исхрана и избегнување на онаа храна којашто се смета за нездрава.
Терминот првпат бил употребен во 1990 година од страна на д-р Стивен Братман.
Како што е анорексијата страв личноста да не се здебели, така орторексијата е страв од тоа дека јаде намирници поради кои нема да биде здрава.
Професорот по психологија на универзитетот Тулуз, Патрик Дену, вели дека поединецот кој страда од орторексија е под влијание и збунет од низата правила што си ги наметнува себеси. Притоа неретко се изолира социјално, прескокнувајќи ги социјалните настани на кои е во опасност да дојде во искушение и да изеде, на пример, пржени компири. Париската нутриционистка Софи Ортега предупредува дека „чистата исхрана“ влијае на дефицитот на витаминот Б12 во организмот, а него го има во јајцата, млечните производи, месото и рибата.
Орторексијата се уште не е болест евидентирана во медицината, како што се анорексијата или булимијата, потсетува психијатарот Ален Перу, со образложение дека станува збор повеќе за фобија, отколку за нарушување во исхраната. Како и други видови на фобии, и оваа може да се лекува со когнитивно-бихевиорална терапија, вели тој.
