Ова се пет основни прегледи или испитувања, кои се неопходни да ги правите на определен период за да го зачувате своето здравје.
ОЧЕН ПРЕГЛЕД
Специјалистите препорачуваат да го проверуваме видот на секои две години, но ако носите очила или контактни леќи за корекција на кратковидоста или далекувидоста, тогаш секоја година. Очните болести вообичаено се без болка или со полесни симптоми во споредба со другите болести, а некои од нив, како на пример глаукомот не дава никакви симтоми долг период откако ќе почне болеста. Промените во органите за вид може да се сигнал и за други недијагностицирани медицински проблеми, како висок крвен притисок или дијабетес. Тоа што според вас, гледате добро, не секогаш значи дека со вашите очи се е во ред.
КОНТРОЛА НА КРВНИОТ ПРИТИСОК
Дури и да немате никакви проблеми со притисокот, во смисол на повремено качување или спуштање, специјалистите ги советуваат особено жените меѓу 18 и 65 години, најмалку еднаш годишно да го мерат крвниот притисок. Многу е важно апаратот да е точен (по можност професионален) и процедурата да се извршува правилно – во смирена состојба, седнати, по пет минути во комплетен мир, со точно поставена манжетна на раката, да се повтори три пати и да се пресмета средната вредност. Затоа е најдобро притисокот да ви го измери медицинско лице, препорачуваат кардиолозите.
ПАП ТЕСТ
Овој гинеколошки тест се препорачува на сите жени од 25 до 49 година, најмалку еднаш на две години. Процедурата е брза и безболна за пациентката, а резултатот е многу корисен за утврдување на промени на клетките на грлото на матката. Во повеќето случаеви, абнормалните клетки може да се вратат во нормална состојба сами од себе, но понекогаш потребно е да се отстранат, за да се спречи развој на цервикален карцином. При ПАП тест се земаат клетки од грлото на матката и се испитуваат под микроскоп за евентуални промени.Благодарение на овој тест, кој е воведен кај нас како превентивна мерка, бројот на жени со рак на грло на матка значително е намален.
СТОМАТОЛОШКИ ПРЕГЛЕД
Никој особено не сака да оди на стоматолог, но ако чекате прво да ве заболи заб, па да отидете, тогаш посетата станува понепријатна, болката посила, а лекувањето подолго и, секако, поскапо. Затоа, најдобро е да се прават редовни превентивни прегледи. Вообичаено се препорачува забите да се проверуваат на секои шест месеци, но периодот зависи и од индивидуалната состојба на пациентот. Ако имате здрави заби и добро се грижите за својата орална хигиена, може на преглед да идете и еднаш во годината, но ако имате лоши заби и проблеми со непцата, правете го тоа на шест месеци. Во случај да страдате од некакви дентални заболувања или од други болести кои може да ви се одразат на забите, посетувајте го стоматологот почесто, на секои два до три месеци.
МЕРЕЊЕ НА ХОЛЕСТЕРОЛОТ
Ова мерење неопходно е да се прави, бидејќи зголеменото ниво на лошиот холестерол нема рани симптоми, туку првиот сигнал може да е срцев удар, предупредуваат лекарите. Мерењето се препорачува на лица по 40-тата година и се контролира преку земање крв за лабораториско испитување. Ако немате никакви ризик фактори и предиспозиција кон висок холестерол, со претходно добар резултат, тестот може да го повторите на три до пет години, објаснуваат лекарите.
