Остеоартритисот е болест која може да се појави на кој било зглоб во телото, а најчеста е кај постарите лица. Лекувањето на остеоартритисот зависи од интензитетот на симптомите, а ќе помогнат разни препарати, промени во навиките и лекови кои ќе ги ублажат проблемите.
КАКО ДА ПРЕПОЗНАЕТЕ ОСТЕОАРТРИТИС?
Остеоартритисот ги зафаќа зглобовите на рацете, нозете, прстите, рамената, вратот или долниот дел на грбот, колковите и колената.
Кај оваа болест, ‘рскавицата која ги покрива краевите на коските се разградува, се истроши, предизвикува триење на коските во внатрешноста на зглобовите и пропаѓа, а како резултат на тоа доаѓа до силни болки, непријатност, вкочанетост, ограничено движење, отежнато движење, чувствителност на допир, воспаление, крцкање при движење на зглобовите и отекување на зглобовите.
На почетокот на болеста, симптомите не се толку изразени, но како што болеста напредува, болката и останатите симптоми стануваат поинтензивни. Исто така, симптомите може да варираат во зависност од зафатениот зглоб, а може да варираат од личност до личност.
ШТО ПРЕДИЗВИКУВА ОСТЕОАРТРИТИС?
Оваа болест најчесто се јавува со стареењето бидејќи е предизвикана од оштетување на зглобовите кои се истрошуваат со годините. Освен тоа, на појавата на остеоартритис влијаат и повредите на зглобовите во минатото, прекумерната телесна тежина, лошото држење на телото, генетската предиспозиција, како и други болести кои влијаат на зглобовите како што се други видови артритис.
Постојат два типа на остеоартритис: примарен кој е најчест и кој ги зафаќа прстите, ‘рбетот, колковите и колената, а точната причина е непозната. Може да се јави и секундарен кој се јавува поради претходно постоечка абнормалност на зглобовите предизвикана од друга болест или состојба како како спортска повреда, други видови артритис или други болести на зглобовите.
КАКО СЕ ДИЈАГНОСТИЦИРА ОСТЕОАРТРИТИСОТ?
Остеоартритисот го дијагностицира лекар, но и специјалист. Лицето ќе треба да помине низа испитувања, а дијагнозата ќе се постави само кога ќе се појават симптоми кои не престануваат, додека често се открива случајно по одредена повреда.
За да може лекарот да биде сигурен дека се работи токму за оваа состојба, неопходно е да се направи рендген на зафатениот зглоб или магнетна резонанца. Може да бидат потребни и крвни анализи за да се исклучат други болести.
КАКО СЕ ТРЕТИРА ОСТЕОАРТРИТИСОТ?
Во зависност од интензитетот на симптомите, ќе зависи и самото лекување. Не постои лек за самата болест или лек кој ќе го забави текот на болеста. Наместо тоа, се користат лекови за ублажување на симптомите на остеоартритис.
Во некои случаи ќе биде доволно само да се сменат навиките, како на пример слабеење или вежбање, понекогаш ќе помогнат препарати како топли или ладни облоги, одмор, лекови против болки како парацетамол или ибупрофен, креми и масти, а во некои случаи ќе биде потребна физикална терапија или дури и операција или вградување на вештачки зглоб, како на пример кај колкот.
Исто така, на некои луѓе, лекарот ќе препише одредени помагала како што се бастун, протеза, патерици, потпори или специјални чевли.
ХРАНА
Одредени намирници се добри за зглобовите и можат да помогнат при воспаление. Тука спаѓаат:
- Рибино масло
- Зелен чај
- Ѓумбир
- Храна богата со витамин Ц и витамин Д
- Омега 3-масни киселини
- Бета каротен
