Не чекајте да стане предоцна за да почнете да се грижите за здравјето, а особено за здравјето на коските, односно активно да работите на превенцијата од остеопороза. Оваа болест доведува до намалување на густината на коските и ги прави поподложни на фрактури. Повеќето заболени од остеопороза се жени, иако ни мажите не се поштедени од оваа болест.
Од клучна важност кога станува збор за превенцијата е низ исхраната да се внесува доволно калциум и витамин Д. Освен млечните производи со калциум се богати и смоквите, бадемите, зелениот листест зеленчук, брокулата, бамјите, сардините, лососот и тофуто. Храната збогатена со витамин Д, како и морската риба претставуваат добри извори на овој витамин. Важен е и внесот на магнезиум, калиум и витамин Ц, кои главно ги има во овошјето и зеленчукот и јаткастите плодови. Од исхраната исфрлете ги газираните сокови и органичете го внесот на алкохол, кофеин и сол.
Доколку сте пушач потрудете се да ја коригирате оваа навика со оглед на тоа дека пушењето претставува сериозен фактор ризик за остеопороза.
Конечно, редовно бавете се со физички активности – одење, вежби за сила со сопствената тежина, јога и таи-чи кои го поддржуваат здравјето на коските, го подобруваат држењето на телото и го намалуваат ризикот од падови.
