Веќе сте запознаени со сценариото, прво се јавува течење на носот, потоа можеби и кашлица – знаете дека станува збор за настинка. За жал, кога веќе ќе се појават симптомите, нема да ја спречите, но можете да ја ублажите. Лекарите уверуваат дека со овие методи ќе ја ограничите сериозноста и траењето на симптомите на настинката.
- Останете хидрирани
“Кога ќе забележам настинка, се трудам да се хидратирам и да ги одржувам електролитите“, вели д-р Амет Р. Камат, директор на хируршкиот оддел за синуси и глава во болницата Вајт Плејнс во Њујорк.
Неговата стратегија за хидратација вклучува пиење доволно вода (а понекогаш и напивки од електролити) и избегнување на напивки кои дехидрираат, како што се високи дози на кофеин или алкохол.
“Водата помага при испорака на кислородот и елиминирање на токсините од телото. Помага и во протокот на лимфата, која е од суштинско значење за функционирањето на имуниот систем“, вели д-р Камат.
- Пијте топла течност
Лекарот од Њујорк, д-р Патрик Фрателоне пие многу топли течности, особено билни чаеви, кога ќе почне да забележува симптоми на настинка.
Освен што го смируваат грлото, топлите течности обезбедуваат слузта што ја произведува телото да не стане премногу густа додека организмот се бори против вирусот.
“Некои од чаевите што ги користам се листови од коприва, ехинацеа и бозел поради нивните антивирусни својства и тоа со една лажичка сиров мед поради неговите антиоксидантни и антимикробни својства“, објаснува д-р Фрателоне.
- Испирање на грлото
Уште една од методите на д-р Фрателоне е гаргарање со солена вода, што може да помогне да се намали болката во грлото. Ставете 1/4 до 1/2 лажичка кујнска сол во чаша вода и направете гаргара за да го ублажите отокот и иритацијата. Исплукајте ја содржината кога ќе завршите.
- Спиење
Во ноќите кога ќе почувствува настинка, докторката од итната медицинска помош, д-р Дариа Лонг Гилеспи се грижи да легне еден или два часа порано.
“Кога сте ненаспиени, вашиот имун систем станува поподложен на инфекции“, вели Гилеспи.
Покрај ова, таа во близина има нестероиден воспалителен лек во случај на какви било болки во телото или треска што може да влијае на квалитетот на нејзиниот сон.
“Количината на сон може да варира од личност до личност, но генерално, се трудам да добијам најмалку седум до осум часа кога ќе почнам да се чувствувам лошо. Квалитетниот сон може да го подобри производството на антитела и функцијата на Т-клетките кои се борат против вирусите“, објаснува д-р Камат.
Сонот го намалува производството на хормони на стрес и провоспалителни молекули, додава тој, што треба да овозможи подобра имунолошка функција.
- Исплакнете ги синусите
Кога д-р Камат почнува да чувствува назални симптоми, тој ги плакне синусите два пати на ден.
“Плакнењето помага и во намалување на вискозноста на слузта, овозможувајќи му на вашето тело побрзо да ја исчисти“, вели тој.Обично избира раствор за нос, но може да се користи и физиолошки раствор.
- Забавете
“Дополнително, работам на управување со стресот во времето поминато надвор од работа, преку секојдневна медитација и вежбање, притоа одржувајќи добра хидратација. Се трудам умерено да вежбам затоа што тоа обично помага при симптомите на течење на носот, затнат нос и болка во грлото“, нагласува д-р Камат.
Сè додека симптомите на настинка се над вратот, што значи дека најмногу влијаат на грлото, устата и носот, благата до умерена физичката активност може да помогне. Само секако не заборавајте да ја намалите должината и интензитетот на вашите вообичаени вежби и да го слушате вашето тело кога е време да престанете или целосно да го прескокнете вежбањето, наведуваат лекарите од Мајо Клиниката.
- Дишете чист воздух
Д-р Куњана Мавунда, педијатриски пулмолог од Флорида, користи прочистувач на воздух како форма на превенција и олеснување на симптомите на настинка.
“Квалитетот на воздухот што го дишеме влијае на здравјето на дишните патишта. Загадениот воздух, без разлика дали е надворешен или внатрешен (домашен) воздух, може да ја оштети заштитната обвивка на дишните патишта“, истакнува таа.
Ова ги олеснува респираторните инфекции, додава таа, бидејќи тогаш вирусот или бактериите полесно ќе навлезат во дишните патишта.
- Изберете вистински намирници
Тоа значи избегнување или ограничување на шеќерот, внесување доволно влакна и витамин Ц кога чувствувате настинка.
“Јадам многу агруми, а понекогаш во водата додавам и лимон“, вели д-р Камат. Покрај цитрусното овошје, внесува и кељ, брокула, црвен кромид, сладок компир, тиквички и мешунки поради нивните антиоксидантни ефекти.
Исто така, го зголемува и внесот на житарки, бидејќи тие се богати со влакна наречени бета-глукани, кои се поврзани со функцијата на имуниот систем, се наведува во International Journal of Molecular Sciences.
