Резултатите од неодамнешната шведска студија предупредуваат за негативниот ефект на стресот врз менталната функција. Имено, шведските научници утврдиле дека стресот може да биде причинител на сериозни, хронични проблеми со памтењето.
Во период од четири години научниците ја следеле состојбата на 1077 личности на возраст од 40 до 79 години, меѓу кои голем број од нив се жалеле на секојдневни проблеми со памтењето. Меѓутоа на тестовите за меморија дури 90 отсто од испитаниците имале нормални резултати, додека, исто така, немале никакви хемиски реакции, ниту физички промени на мозокот кои можат да се поврзат со раните стадиуми на деменција.
Од друга страна, дури 70 отсто од испитаниците биле под интензивен стрес или пателе од синдром на „прегорување“ или депресија. Во стресни ситуации доаѓа до лачење на адреналин кој всушност го подобрува памтењето барем краткорочно. Меѓутоа ако стресот трае и понатаму се лачи и кортизол, а хронично зголемено ниво на кортизол ја намалува нашата способност јасно да размислуваме. Авторите на студијата предупредуваат на тоа дека хроничен стрес, исто така, може да доведе до оштетување на мозочните структури задолжени за памтење, како што е хипокампусот.
