Благодарение на истражувањата конечно имаме одговор на прашањето – Зошто е толку тешко да се каже НЕ на чоколадо за време на ПМС? Нутриционистката Мелани Мекграјс објавила пост со истражувања кои од различни гледни точки ја анализираат оваа загатка. Многумина веруваат дека во прашање е хормонален дисбаланс кој се јавува за време на менструалниот циклус. Нивото на естроген, прогестерон и серотонин опаѓа, а расте нивото на кортизол, хормонот на стрес. Резултат на сиот тој хормонален хаос е потрагата по чоколадо.

НАКУСО: Јадеме за да се чувствуваме барем малку среќни!

Меѓутоа, Мелани не е баш убедена во ова. Таа копала малку повеќе по архивата со истражувања и нашла резултати кои ги споредуваат желбите за чоколадо кај жените кои живеат во различно развиени држави и на различни страни од светот. Открила дека врз ова голем ефект има влијанието на општеството и културата во која живее жената. Исто така, жените заради своите вообичаени навики си создаваат слика во главата дека токму тогаш им треба чоколадо. Дами, ајде сетете се колку пријателки ве прашале дали сакате нешто слатко додека се борите со менструалните грчеви?! Овие студии всушност покажале дека во некои делови од светот станало сосема вообичаено жените да јадат чоколадо пред менструација и почесто да се дружат една со друга, па така таа желба почнува да влијае и на оние околу вас. За крај, Мелани заклучува дека желбата за чоколадо е мешавина од физиологијата на телото, психологијата и културното опкружување.