Додека здравствените работници и научниците се уште бараат одговори за тоа како се шири вирусот на мајмунските сипаници, група на истражувачи пронашле уште два симптома на мајмунски сипаници кои досега не биле типични одбележја на болеста.
Студија објавена во списанието British Medical Journal ги проучувала податоците од 197 пациенти со мајмунски сипаници во Велика Британија.
Тимот на истражувачи открил дека за разлика од претходните верзии на мајмунски сипаници, моменталната епидемија на вирусот предизвикува нови симптоми заедно со останатите класични знаци на мајмунски сипаници.
Дури 71 пациент вклучен во студијата имал ректални болки, 33 страдале од воспаление на грлото, 31 од едем на пенисот и 27 од орални лезии, 22 пациенти имале солитарни лезии, а 9 од нив пријавиле зголемени крајници.
СОЛИТАРНИ ЛЕЗИИ
Еден од новите симптоми откриени во студијата биле солитарни лезии. Станува збор за мала, локализирана кожна лезија која може да варира од безопасни (брадавици) до опасни по живот лезии како што е меланом.
ОТЕЧЕНИ КРАЈНИЦИ
Пациентите во студијата, исто така, пријавиле отечени крајници, за кои, заедно со одделните лезии, претходно не се знаело дека се типични карактеристики на инфекцијата со мајмунски сипаници и можело да се помешаат со други состојби.
- Класични знаци на мајмунски сипаници
Класичните и очигледни симптоми на мајмунски сипаници вклучуваат треска, главоболка, болки во мускулите и зглобовите, болки во грбот, отечени лимфни јазли, осип и замор, како и осип што наликува на сипаници.
- Како се шири болеста?
Болеста од човек на човек може да се пренесе преку капков пат (близок контакт) и контакт со промени на кожата кои се јавуваат кај пациентот.
Авторите на студијата потенцираат дека ова истражувања има и одредени ограничувања – сите пациенти биле од еден медицински центар, а студијата била набљудувачка.
