Заради оштетувања на ’рскавицата на многу пациенти секојдневните обврски, па и обичната прошетка им е напор и мошне болна препрека. До неодамна се сметало дека нејзиното обновување не е можно, но американските научници објавиле резултати на студија која го отфрлила ова мислење, што, секако, отвора нови можности за лекување на остеоартритисот.
Иако досега се сметало за спротивно, ’рскавицата во човековиот организам сепак може да се регенерира, потврдило и истражувањето на Универзитетот „Дјук“. Додуша станува збор за ограничени капацитети, но доволни да бидат појдовна точка за пронаоѓање нови начини во лекувањето на остеоартритисот.
Досегашното мислење е засновано на недостатокот на крв во ’рскавицата на зглобовите, заради што обновувањето се сметало за невозможно. Меѓутоа според новите податоци, клучна улога во процесот на регенерација нема крвта, туку молекуларниот процес сличен на оној кој некој вид гуштери го користат за обнова на изгубените екстремитети. Овој процес е најефикасен во зглобовите, нешто помалку во колената, а најмалку во колковите, напоменуваат научниците.
