Ново истражување на научници од Универзитетот во Калифорнија ја оспори популарната теорија дека човечките емоции се ограничени на шест главни категории – среќа, тага, бес, изненадување, страв и одвратност.
Според актуелните податоци, основните состојби на човечката емоција се всушност многу поразновидни. Користејќи статистички модели за да ги анализираат реакциите на повеќе од 800 луѓе со повеќе од 2 000 кратки клипови, истражувачите успеале да идентификуваат 27 различни категории на емоции што ги обединиле на интерактивна мапа.
„Откривме дека 27 одделни состојби, а не шест, се потребни за да се опише начинот на кој стотици луѓе изразија чувство како одговор на секое видео”, рече еден од главните автори на проектот, професор по психологија, Дар Келтнер, цитиран на интернет-страницата на Универзитетот.
Според податоците основните 27 состојби на човечката емоција се:
- одвратност;
- страв;
- ужас;
- растревоженост (анксиозност);
- сексуална желба;
- романтика;
- конфузија;
- забава;
- носталгија;
- непријатност;
- развеселеност;
- љубов;
- радост;
- восхит;
- копнеж;
- жед;
- спокој;
- визуелно задоволство;
- задоволство;
- вознемиреност;
- интерес;
- тага;
- здодевност;
- гнев (лутина);
- олеснување;
- болка;
- изненадување.
Исто така, американските научници разбиле и друго клише, а тоа е дека секоја одделна емоција е сама за себе. Според експериментот „има непречена транзиција на емоции меѓу, на пример, самопочитувањето и спокојот, ужасот и стравот, развеселеноста и обожувањето”, посочува Келтнер.
Според зборовите на водечкиот автор Алан Коен, можно е да биде составена карта на основните емоции, бидејќи сите одделни чувства се меѓусебно поврзани.
Сите 853 учесници во експериментот требало да одговорат на тоа какви чувства будат кај нив 2 185 видеа со траење од пет до 10 секунди, кои изразувале најразлични настани – свадби, предлози за брак, смрт, страдање, убави природни глетки, страшни животни, непријатни или смешни моменти.
