Околу 60 проценти од лицата со јужноазиско потекло имаат таков високоризичен ген, информираа викендов научниците од Универзитетот во Оксфорд, додавајќи дека откритието делумно го појаснува големиот број на смртни случаи од последици од КОВИД-19 во некои британски заедници, но и на индискиот потконтинент.
ПОГОЛЕМ РИЗИК ПОРАДИ РАЗЛИКА ВО ДНК
Научниците откриле дека тој ризик не е поголем поради разликите во генетското кодирање на протеинот, туку поради разликите во ДНК која создава своевиден “прекинувач“ и притоа го активира генот.
Тој генетски сигнал веројатно ќе делува на клетките во белите дробови, додека високоризичната верзија на откриениот ген, наречена LZTFL1, веројатно спречува клетките кои ги “обложуваат“ дишните патишта и белите дробови правилно да реагираат на вирусот.
ВИСОКОРИЗИЧНАТА ВЕРЗИЈА НА ГЕНОТ НЕ ВЛИЈАЕ НА ИМУНИОТ СИСТЕМ
Но, високоризичната верзија на генот не влијае на имуниот систем на организмот кој создава антитела за да се бори против инфекцијата, велат истражувачите.
Тие истакнуваат дека лицата кои во себе ја носат оваа верзија на генот треба нормално да реагираат на достапните вакцини.
“Студијата упатува на тоа дека е критичен начинот на кој белите дробови реагираат на инфекција. Ова е значајно бидејќи повеќето лекувања што се применуваат се фокусирани на промена на начинот на кој имуниот систем реагира на вирусот“, вели коавторот на студијата, професор Џејмс Дејвис.
Резултатите од истражувањето се објавени во стручното списание Nature Genetics.
